जनकपुरधाम । साल्ट ट्रेडिङ कर्पोरेशन लिमिटेड, जनकपुरधामले चालू आर्थिक वर्ष २०७९/८० को फागुन मसान्तसम्म ११ करोड ७२ लाख ९० हजार रुपैयाँको आयोडिनयुक्त नुन विक्री गरेको छ । साउनदेखि फागुनसम्म ६३ हजार ४ सय क्विन्टल नुन विक्री भएको कर्पोरेशनको जनकपुरधाम कार्यालयका प्रमुख शुभनारायण साहले जानकारी गराए । यस अवधिमा १ लाख २६ हजार ८ सय बोरा नुन खपत भइसकेको उनको भनाइ छ । आयोडिनयुक्त नुन डिलरका लागि प्रतिप्याकेट १८ रुपैयाँ ५० पैसामा दिने गरेको साहले बताए । उनका अनुसार धनुषा, महोत्तरी र सिन्धुली जिल्लाका डिलरलाई आयोडिनयुक्त नुन प्रतिप्याकेट २० रुपैयाँमा सर्वसाधारणलाई उपलब्ध गराउन निर्देशन दिइएको छ ।