जनकपुरधाम । जानकी नवमीको अवसरमा जनकपुरधाममा साँस्कृतिक महोत्सव तथा मैथिली फुड फेस्टिभलको आयोजना गरिएको छ ।
भारतीय दुतावास र स्वामी विवेकनन्द सांस्कृतिक केन्द्रको संयुक्त रुपमा आयोजना गरेको उक्त फेस्टिभलमा मिथिलाका प्रसिद्ध खानाका परिकारहरुको प्रदर्शन गरिएको छ । फेस्टिभलमा मिथिलाको प्रसिद्ध खानाका परिकारहरू मिटाई, दही, अदौरी, तिलौरी, दूधपीठा, दालपीठा, कोदोको रोटी, तिलकोरको तरुवा, सकरौडी, महिआउर, अमोट, कडही, वडी, विभिन्न प्रकारको तरुवा सहितका ८८ प्रकारका परिकारहरूको प्रदर्शन गरिएको आयोजक संस्थाले जनाएको छ ।

यता, फेस्टिभलको उद्घाटन गर्दै मधेश प्रदेशका प्रदेश प्रमुख हरिशंकर मिश्रले नेपाल भारतको धर्म, संस्कृति, कला तथा खानपान मिल्दो भएकाले यस्तो कार्यक्रमले दुवै देशको सम्बन्धलाई थप सुमधुर बनाउन मद्दत पुग्ने बताए ।
कार्यक्रममा वीरगञ्जस्थित महावाणिज्य दूतावासका काउन्सिलर नीतिश कुमार, तमलोपाका अध्यक्ष बृषेशचन्द्र लाल,स्वामी विवेकनन्द सांस्कृतिक केन्द्रका अधिकृत निरज भण्डारी सहितका वक्ताहरुले नेपाल र भारत बीच रहेको पौराणिक सम्बन्ध वारे चर्चा गरेका थिए ।