जनकपुरधाम । प्रत्येक वर्षझैँ यस वर्ष पनि जनकपुरधाममा दसैँको रौनक देखिएको छ । दसैँको घटस्थापनाका दिन बिहानैदेखि यहाँका शक्तिपीठहरू राजदेवी मन्दिर, राम मन्दिरसहितमा श्रद्धालु भक्तजनहरूको भीड लागेको छ । दसैँको अवसरमा जनकपुरधामका शक्ति पीठहरूलाई दुलहीझैँ सिंगारिएको छ ।
जनकपुरधाममा दसैँ विशेष रूपमा मनाउने चलन छ । यहाँका विभिन्न शक्तिपीठहरूमा भव्य आकर्षक स्वागतद्वार एवम् पण्डालहरू बनाइएका छन् । विद्युतीय बल्बहरूले यहाँका मठमन्दिरहरू झकिझकाउ बनेका छन् ।मिथिलाका राजा जनककी कुलदेवी राजदेवी मन्दिरलाई विशेष रूपमा सिंगारिएको छ ।
जनकपुरधामका राम युवा कमिटी, महावीर युवा कमिटी, गणेश युवा कमिटीले संयुक्त रूपमा कामको विभाजन गरी दसैँलाई भव्य बनाउँदै आएका राम मन्दिरका महन्त राम गिरिले बताए ।
त्यसैगरी जनकपुरका बौद्धिमाई, अमरखानामाई, पिडरियामाई, फुलेश्वरीमाई, सोनासति मन्दिर, दक्षिणकाली मन्दिरलगायतका अन्य दर्जनौँ शक्तिपीठहरूलाई पनि झकिझकाउ बनाइएको छ । विभिन्न चोकहरूमा दुर्गाको भव्य प्रतिमाहरू पनि बनाइएका छन् ।
