जनकपुरधाम । मधेश प्रदेशको स्वास्थ्य आपूर्ति व्यवस्थापन केन्द्रमा फेरि पनि ‘मेडिकल माफिया’ र राजनीतिक हस्तक्षेप देखिएको छ।
स्वास्थ्य मन्त्रालय स्रोतका अनुसार केन्द्रका निर्देशक डा. सुनिल प्रसाद कुशवाहालाई गैरकानुनी ढंगले पदमुक्त गरी डा. राजीव कुमार झालाई निमित्त निर्देशक नियुक्त गरिएको छ। स्रोतका अनुसार कुशवाहा पारदर्शिता र प्रक्रिया पालनमा अडिग रहेकाले औषधि आपूर्तिमा संलग्न माफिया विशाल पण्डित र स्वास्थ्य मन्त्री सत्रुधन प्रसाद सिंहको दबाबमा हटाइएको हो।
करीब २२ करोड रुपैयाँ बराबरको ठेक्कामा असहमति जनाएपछि कुशवाहालाई धम्की दिँदै हटाउने रणनीति बनाइएको थियो। दुई साता अघि मुख्यमन्त्रीको कार्यकक्षमै कुशवाहासहित कर्मचारीलाई ज्यान मार्ने धम्कीसमेत दिइएको थियो।
विशाल पण्डितमाथि यस्तै प्रकृतिका चार ठेक्कासम्बन्धी मुद्दा अख्तियारमा दर्ता भइसकेका छन्। तर राजनीतिक संरक्षणका कारण उनी उम्कँदै आएका छन्।
यस घटनाले स्वास्थ्य आपूर्ति प्रणालीमा माफियातन्त्र हावी भएको भन्दै कर्मचारी र सचेत वर्गले आपत्ति जनाएका छन्। डा. कुशवाहाले कानुनी बाटो अपनाउने तयारी गरिरहेका छन् भने मन्त्री र पण्डित पक्ष मौन छन् ।
