जनकपुरधाम । धनुषाको मैनाथपुरस्थित नेपाल–भारतको सीमावर्ती क्षेत्रमा पाँच राउण्ड गोली चल्दा भारतीय सीमा सुरक्षा बलका एक जवानसहित दुई जना घाइते भएका छन् । मैनाथपुर बजारस्थित दशगजापारि भारततर्फको सीमामा खटिएका एसएसबीका जवान र स्थानीय भारतीय नागरिकबीच विवाद भई झडप हुँदा गोली चलेको हो ।
भारतीय प्रहरीका अनुसार पाँच राउण्ड गोली फायर भएको छ । स्थानीय युवा र एसएसबीका जवानबीच झडप भएको भिडियोसमेत सार्वजनिक भएको छ, जसमा केही व्यक्तिले प्रहरीको राइफल नै खोस्न खोजिरहेको देखिन्छ ।
भारत सरकारले रासायनिक मल नेपाल लैजान प्रतिबन्ध लगाएको छ । तर, ती व्यक्तिहरूले रासायनिक मल नेपालमा अवैध रूपमा निकासी गर्ने क्रममा प्रहरीले रोक्न खोजेपछि झडप भएको हो ।
भारत जयनगरका पत्रकार ललित झाका अनुसार घटनामा स्थानीय भरत पासवानलाई गोली लागेको छ । एसएसबीका जवान राज गोडाको टाउकोमा चोट लागेको छ ।
