जनकपुरधाम । मधेश प्रदेशसभाका नवनिर्वाचित सभामुख रामअशिष यादवले संघीय सरकारले प्रदेश सरकारलाई आफ्ना विकासे अडडको रुपमा लिएको आरोप लगाएका छन् ।
संघियता अभ्यासको यतिको वर्ष भईसक्दा पनि संघीय सरकारले प्रदेशलाई ‘को–अपरेटिभ’ जस्तो संस्थाको रूपमा प्रयोग गरिरहेको सभामुख यादवको भनाई थियो । सोमबार पदभार ग्रहण गर्दै सभामुख यादवले संविधानले दिएको अधिकार प्रयोग गर्न नदिई संघीयताको नाममा प्रदेशलाई बजेट खर्चको निगरानी गर्ने मात्र इकाइका रूपमा सीमित गरिएको बताए । यसले संघीय व्यवस्थाको मर्ममाथि प्रहार गरेको उनको भनाइ थियो।
सभामुख यादवले प्रदेशसभामा सुशासन कायम गर्दै लोकतान्त्रिक मूल्यमान्यता अनुसार प्रभावकारी, उत्तरदायी र मर्यादित ढंगले सञ्चालन गर्ने प्रतिबद्धता व्यक्त गरे। उनले संसदीय अभ्यासलाई सुदृढ बनाउने, विधायिकाको गरिमा उकास्ने र विधिप्रक्रियामा आधारित निर्णयलाई प्राथमिकता दिने उल्लेख गरे । ‘सभामुखको कुर्सी राजनीतिक आग्रह–पूर्वाग्रहभन्दा माथि हुन्छ,’ उनले भने, ‘संविधान, कानुन र संसदीय नियमावलीको पूर्ण पालना गराउँदै सभालाई उत्तरदायी बनाउने मेरो दायित्व हो।’
उनले विषयगत समितिहरूलाई सक्रिय बनाउँदै विधेयकमाथि छलफल, संशोधन तथा सहमति निर्माणमा सभामुखको भूमिकालाई प्रभावकारी बनाउने प्रतिबद्धता जनाए । प्रदेशसभाले कार्यपालिकामाथि प्रभावकारी निगरानी गर्नुपर्ने आवश्यकता औंल्याउँदै सभामुख यादवले बजेट कार्यान्वयन, सार्वजनिक खर्चको पारदर्शिता र सेवाप्रवाहको गुणस्तरमा संसद अझ सशक्त हुनुपर्ने धारणा राखे ।
पदभार ग्रहण कार्यक्रममा सरकारका मन्त्री, सांसद तथा उच्चपदस्थ अधिकारीहरूको उपस्थिति रहेको थियो। सभामुख यादवले पदभार ग्रहण गर्नु अघि जनकपुरधामको मुजेलियास्थित मधेश आन्दोलनका शहिदहरुको शालिकमा मलाअपर्ण समेत गरेका थिए ।
सम्बन्धित खबर
