जनकपुरधाम । मधेश प्रदेशको धनुषा–महोत्तरी सीमास्थित रातो पुल क्षेत्रमा शंकास्पद वस्तु पड्किँदा दुई बालबालिका घाइते भएका छन् ।
धनुषाको मिथिला नगरपालिकास्थित बडहरी बजारनजिक मंगलबार अपराह्न विस्फोटक पदार्थ पड्किँदा स्थानीय १६ वर्षीया अरुणिमा भुजेल र १२ वर्षीय सुशील माझी घाइते भएका हुन । दुवै जना बजार क्षेत्रनजिकै खेलिरहेको बेला अज्ञात वस्तु अचानक विस्फोट भएको बताइएको छ ।
यसैबीच, धनुषा–महोत्तरी सीमा क्षेत्रमा अर्को शंकास्पद वस्तु फेला परेको थियो । उक्त वस्तु सुरक्षाकर्मीले नियन्त्रणमा लिएपछि नेपाली सेनाको टोलीले निष्क्रिय पारेको जनाएको छ । घटनापछि पूर्व–पश्चिम लोकमार्गआसपास केही समय त्रासको अवस्था सिर्जना भएको थियो ।
प्रहरीले सर्वसाधारणलाई शंकास्पद वस्तु नछुन तथा देखिएमा तुरुन्तै नजिकको प्रहरी कार्यालयमा खबर गर्न आग्रह गरेको छ । घटनाबारे थप अनुसन्धान जारी रहेको प्रहरीले जनाएको छ ।
