जनकपुरधाम । सिराहा जिल्लाको सदरमुकाम सिराहास्थित जिल्ला अदालत बार एसोसिएसनको कार्यालय रहेको भवनको सटरमा रहेको ‘ल फर्म’मा विस्फोट भएको छ।
सिराहा जिल्ला अदालतअगाडि रहेको बारको कार्यालय भवनको सटर भाडामा लिएर अधिवक्ता मधुसुदनप्रसाद यादवले चलाइरहेको फर्ममा बुधबार अपराह्न करिब सवा ४ बजेतिर विस्फोट भएको प्रहरीले जनाएको छ।
सिराहा प्रहरी प्रमुख प्रहरी उपरीक्षक बासुदेव पाठकका अनुसार ल फर्ममा भएको विस्फोट सुतली बम हो या अन्य बम भन्ने यकिन भइसकेको छैन। ‘विस्फोटमा फर्ममा काम गर्ने एक सहयोगीको हातको औँला र खुट्टामा सामान्य चोट लागेको पाइएको छ,’ उनले भने, ‘उनको पहिचान खुलिसकेको छैन, प्रहरी र सेनाको टोली अहिले घटनास्थलमै छौँ।’
विस्फोट भएको सटर वरपर र कोठामा पनि त्यस्तो कुनै पर्चा पम्प्लेट नभेटिएको जानकारी दिँदै उनले नेपाली सेनाको चोहर्वास्थित नन्दाबक्स गणबाट डिस्पोजल टोली घटनास्थल आइसकेकाले थप बुझ्ने काम भइरहेको बताए।
सम्बन्धित खबर
