जनकपुरधाम । रौतहटमा एक लेखापाललाई युवाहरुको एक समुहले कालोमोसो दलेका छन् । पुर्वाधार विकास कार्यालय, सडक डिभिजन कार्यालय, भू संरक्षण तथा पर्यटन कार्यालय रौतहटका लेखापाल सुदिप गौतमलाई भ्रष्टाचारी भन्दै युवाहरुको एक समुहले मंगलवार कालोमोसो दलेका हुन् ।
युवाहरुले भ्रष्टाचारको आरोप लगाउँदै लेखापाल गौतमलाई कालोमोसो दलेको भिडियो यतिवेला सामाजिक सञ्जालमा भाइरल भएको छ । चन्द्रपुर स्थित एक होटलमा साथिहरुसँग बसेर मदिरा सेवन गरिरहेको बेला युवाहरूले उनलाई घेराउ गर्दै अनुहारमा कालोमोसो दलेको भिडियोमा देखिन्छ ।
भ्रष्टाचारीलाई कडा सजाय दिनुपर्छ भन्दै सो समूहले लेखापाल गौतमको अनुहारमा कालोमोसो दलेका छन् । चार वटा सरकारी कार्यालयको एकैसाथ जिम्मेवारी सम्हालेर गौतम सरकारी रकममा ब्रहमलुट मच्चाउँदै आएको उनीहरूको आरोप छ।
लेखापाल गौतममाथि हरेक भुक्तानीमा खुलेआम घुस माग्ने, कमिसन दिनको चेक बनाउने र कमिसन नदिनेलाई विभिन्न बहानामा चेक बनाउने आलटाल गर्ने गरेका उनीहरुको आरोप छ । यता, लेखापाल गौतमले उजुरी नदिएको कारण अहिले सम्म कसैलाई पक्राउ नगरिएको जिल्ला प्रहरी कार्यालय रौतहटले जनाएको छ ।
