जनकपुरधाम। धनुषा जिल्लाको कमला नगरपालिका–७ सिङ्ग्याहीमा ट्याक्टर दुर्घटना हुँदा एक जनाको मृत्यु भएको छ। मृत्यु हुनेमा कमला नगरपालिका–६ निवासी ट्याक्टर चालक आकाश यादव रहेका छन्।

इलाका प्रहरी कार्यालय खजुरीका प्रहरी निरीक्षक बबिन्द्र नेम्वाङका अनुसार स १ त ५१२९ नम्बरको ट्याक्टर खेतबाट माटो ओसार्ने क्रममा अचानक अनियन्त्रित भई दुर्घटनामा परेको हो।

दुर्घटनामा गम्भीर घाइते भएका चालक यादवको घटनास्थलमै मृत्यु भएको प्रहरीले जनाएको छ। घटनाबारे जानकारी पाएलगत्तै प्रहरी टोली घटनास्थलमा पुगेर आवश्यक मुचुल्का प्रक्रिया पूरा गरेको छ।

प्रहरीले शवलाई पोस्टमार्टमका लागि प्रादेशिक अस्पताल जनकपुरधाम पठाएको जनाएको छ। दुर्घटनाको कारणबारे थप अनुसन्धान भइरहेको प्रहरीले जनाएको छ।