जनकपुरधाम । मधेश प्रदेशका गृह, सञ्चार तथा कानुनमन्त्री फकिरा महतोको नेतृत्वमा गरिएको बजार अनुगमनको शैलीप्रति असन्तुष्टि जनाउँदै जलेश्वरका व्यवसायीले बजार बन्द गरेका छन् ।
अनुगमनका क्रममा व्यवसायीलाई त्रसित बनाउने, धम्क्याउने तथा आवश्यक प्रक्रिया पूरा नगरी जरिवाना गरिएको आरोप लगाउँदै व्यवसायीहरूले विरोधस्वरूप बजार बन्द गरेका हुन् ।
उपभोक्ताको हित र बजार नियमनका लागि अनुगमन आवश्यक भए पनि त्यसका नाममा व्यवसायीलाई आतंकित बनाउने र अपमानजनक व्यवहार गर्ने कार्य स्वीकार्य नहुने व्यवसायीहरूको भनाइ छ ।
अनुगमनका क्रममा अपनाइएको कार्यशैलीप्रति आपत्ति जनाउँदै जलेश्वर उद्योग वाणिज्य संघले व्यवसायीहरूसँग ऐक्यबद्धता जनाउँदै मधेश सरकारसमक्ष ज्ञापनपत्रसमेत बुझाएको छ । संघका अध्यक्ष शिवचन्द्र चौधरीको नेतृत्वमा गएको व्यवसायीहरूको टोलीले जिल्ला प्रशासन कार्यालय महोत्तरीमार्फत मधेश सरकारलाई ज्ञापनपत्र बुझाएको हो ।
अध्यक्ष चौधरीले जलेश्वरका व्यवसायीहरूले नेपाल सरकारले तोकेको कानुन तथा मापदण्डको पालना गर्दै व्यवसाय सञ्चालन गर्दै आएको दाबी गरे । तर, अनुगमनका क्रममा मन्त्री महतो नेतृत्वको टोलीले व्यवसायीलाई त्रसित बनाउने तथा धम्की दिने शैली अपनाएको भन्दै त्यसको विरोधमा बजार बन्द गर्नुपरेको उनले बताए ।
संघले अनुगमनका क्रममा सम्बन्धित वस्तुको गुणस्तर परीक्षण नै नगरी गुणस्तरहीन भएको भन्दै सामान नष्ट गर्न लगाइएको, अनावश्यक रूपमा जरिवाना गरिएको तथा अनुगमनका क्रममा प्रश्न उठाउने वा बोल्ने व्यवसायीलाई थुन्ने र मुद्दा चलाउनेसम्मको धम्की दिइएको आरोप लगाएको छ ।
व्यवसायीहरूले बजार अनुगमनलाई प्रतिशोध वा आतंक सिर्जना गर्ने माध्यम नबनाई उपभोक्ता हित संरक्षण तथा व्यवसाय नियमनमा केन्द्रित गर्न माग गरेका छन् । कुनै वस्तुको गुणस्तरमाथि प्रश्न उठेमा सम्बन्धित प्राविधिक तथा प्रयोगशालामार्फत आवश्यक परीक्षण गरेपछि मात्रै कारबाहीको प्रक्रिया अघि बढाउनुपर्ने उनीहरूको माग छ ।
व्यवसायीमाथि भएको भनिएको ज्यादतीको विरोधमा आफूहरू एकताबद्ध रहेको जनाउँदै संघले माग सम्बोधन नभए चरणबद्ध रूपमा आन्दोलन तथा प्रतिकारका कार्यक्रम अघि बढाउने चेतावनी दिएको छ ।
