काठमाडौं । भारतको हैदराबादस्थित रामोजी स्टुडियोमा फिल्म ‘ह्रस्वदीर्घ’को बुधबार तेस्रो दिनको छायांकन भइरहेको छ । नीता ढुंगाना निर्मात्री रहेको यो फिल्मलाई चन्द्र पन्तले निर्देशन गरिरहेका छन् । फिल्मको छायांकन सेटबाट ताजा तस्वीर बाहिरिएको छ, जसले फिल्मका प्रमुख पात्रको ‘क्यारेक्टर लुक्स’बारे बताउँछ ।जुन तस्वीरमा नेपाली अभिनेता रविन्द्र झा भारतीय कलाकारहरु ब्रह्मानन्दम् र अलीसँग देखिएका छन् । ब्रह्मानन्दम् ढाकाटोपी, कुर्था र धोती लगाएर प्रस्तुत भएका छन् भने अलि राजस्थानी लुक्समा देखिएका छन् । रविन्द्र पण्डितको लुक्समा देखिएका छन् । यी तीन चरित्रको यो लुक्सले फिल्मको पात्रबारे खुलासा गर्छ । पहिलो दिन नेपाली अभिनेता र अलीको दृश्यसँगै फिल्मको छायांकन सुरु भएको थियो ।
