झापा । भौतिक पूर्वाधार विकास कार्यालय झापाले पाँच वर्षको अवधिमा १५१ किलोमिटर सडक कालोपत्र गरेको जनाएको छ । कोशी प्रदेश सरकारले आर्थिक वर्ष २०७५/७६ देखि २०७९/८० सम्ममा उक्त सडक कालोपत्र गरेको जनाएको हो ।
कालोपत्र भएकोमध्ये २८ किलोमिटर सडक इलाममा पर्छ । जिल्लाका विभिन्न स्थानमा ६ देखि ३० किमिसम्म सडक कालोपत्र भएको कार्यालयका प्रमुख श्यामकुमार श्रेष्ठले बताए । उनले प्रदेश सरकारले बनाएका योजनाअन्तर्गत बजेट निकासी हुन नसक्दा थप सडक कालोपत्र हुन नसकेको बताए ।
‘जिल्लामा थुप्रै योजना अधुरा छन्,’ उनले भने, ‘बजेट अभावले भने जस्तो काम हुन सकेको छैन ।’ प्रमुख श्रेष्ठका अनुसार दर्जनौं सडक बहुवर्षीय योजनाअन्तर्गत कालोपत्र भइरहेका छन् ।
उनले आधा दर्जनभन्दा बढी सडकको निर्माण सम्पन्न भए पनि ठेकेदारलाई बजेट भुक्तानी गर्न नसकिएको जानकारी दिए । हालै कालोपत्र भएका धुलाबारी-ज्यामिरगढी-भन्द्रपुर, सतासीधाम झिलझिले, दुर्गापुर दानाबारीदेखि इलाम जाने सडक, दमक-५ बुद्धचोकदेखि ढकुरपानी शान्तिचोक हुँदै महेशचोक मोरङ सडक, सुखानी दानाबारी चिसापानी राजदुवाली सडक, अमरपथ कनकाई-तीन सुरुंगादेखि बोर्डरसम्मको सडकको भुक्तानी गर्न नसकिएको प्रमुख श्रेष्ठले बताए ।
बजेट अभावका कारण ठेकेदारलाई भुक्तानी गर्न नसकिएको उनको भनाइ थियो । प्रमुख श्रेष्ठले भने, ‘हामीसँग योजना छ, दक्षजनशक्ति पनि छ तर पर्याप्त बजेट छैन ।’
गाउँका अधिकांश धुलाम्मे सडक कालोपत्र भएपछि स्थानीयवासी खुसी छन् । सडक कालोपत्र भएपछि वर्षौंदेखिको धुलो र हिलोबाट मुक्ति मिलेको स्थानीय रोशन न्यौपानेले बताए । सडक कालोपत्रसँगै ग्रामीण क्षेत्रका विद्यार्थी, कर्मचारी र किसानलाई समेत आवतजावतमा सजिलो भएको छ ।
सोही अवधिमा इलाम र झापामा १० मोटोरेबल पुल, १३ झोलुंगे पुल निर्माण गरिएको भौतिक पूर्वाधार विकास कार्यालय झापाका इञ्जिनीयर अमृतकुमार दाहालले बताए । उनले दुवै जिल्लाका विभिन्न खोलामा ३२ देखि १२० मिटरसम्म लम्बाइ भएका झोलुंगे पुल बनाएको बताए ।
इलामका रतुवामाई, शिवा, झुत्रेमा छ र झापाका देउनिया, हडिया, अदुवालगायत पाँच खोलामा झोलुंगे पुल निर्माण सम्पन्न भइसकेको दाहालले बताए । उनका अनुसार जिल्लामा आठ मोटरेबल पुल निर्माण भएका छन् भने इलाममा दुइटा मात्र निर्माण भएका छन् । –रासस
सम्बन्धित खबर
