जनकपुरधाम । मधेश प्रदेश सरकारको मुख्य न्यायाधिवक्तामा डा. सुनिल रंजन सिंहलाई नियुक्त गरेको छ । मधेश प्रदेशका मुख्यमन्त्री कृष्ण प्रसाद यादवको सिफारिसमा प्रदेश प्रमुख डा. सुरेन्द्र लाभ कर्णले डा. सिंहलाई मुख्य न्यायाधिवक्ताको पदमा नियुक्त गरेका हुन् ।

नेपालको संविधानको धारा १६० को उपधारा (२) बमोजिम आजदेखि लागू हुने गरी सर्लाही जिल्ला ईश्वरपुर नगरपालिका–१४ निवासी डा. सिंहलाई मुख्य न्यायाधिवक्ताको जिम्मेवारी दिइएको प्रदेश प्रमुखको कार्यालयले जनाएको छ ।
प्रदेश प्रमुखको कार्यालयद्वारा जारी विज्ञप्तिमा डा. सिंहको नियुक्तिसम्बन्धी जानकारी सार्वजनिक गर्दै संवैधानिक व्यवस्था अनुसार नियुक्ति गरिएको उल्लेख गरिएको छ ।

नव नियुक्त मुख्य न्यायाधिवक्ता डा.सिंहले प्रदेश सरकारका तर्फबाट कानुनी सल्लाहकारको भूमिका निर्वाह गर्नुका साथै प्रदेश सरकार संलग्न मुद्दामा सरकारको प्रतिनिधित्व गर्ने जिम्मेवारी सम्हाल्नेछन् ।