जनकपुरधाम । सशस्त्र प्रहरीले सिमावर्ति क्षेत्रमा निगरानी कडा पार्दा महोत्तरीमा ठुलो परिमाणमा अवैध रूपमा निकासी गर्न लागिएको स्याउ बरामद भएको छ ।
शनिबार महोतरीको मनराशीसवा नगरपालिका–२ नजिक नेपाल–भारत सिमा क्षेत्रमा जाँचका क्रममा तीन वटा पिकअप गाडीसहित करिब ६ हजार किलोभन्दा बढी स्याउ नियन्त्रणमा लिइएको हो । विशेष सुचनाका आधारमा सशस्त्र प्रहरीले चेकजाँच गरेपछि प्रदेश ०२–०२–००१ च ०७२२, प्रदेश १–०४–००१ च ०४१४ र मधेश प्रदेश ०४–००१ च ०३८० नम्बरका पिकआपमा भारी परिमाणमा स्याउ फेला परेका थिए ।
सशस्त्र प्रहरीले नियन्त्रणमा लिएका गाडीहरूबाट ३४५ वटा कार्टुनमा प्याक गरिएको जम्मा ६ हजार ९ किलोग्राम स्याउ लोड गरिएको अवस्थामा बरामद गरेको थियो ।
सशस्त्र प्रहरी बल महोत्तरीका सहायक प्रवक्ता डीएसपी शैलेन्द्र थापाले बरामद गरिएको स्याउ र सवारीसाधनलाई आवश्यक अनुसन्धान तथा कानुनी प्रक्रिया अघि बढाउन भन्सार कार्यालय महोत्तरी पठाएको जानकारी दिए ।
सीमावर्ती क्षेत्रमा हुने अवैध ओसारपसार नियन्त्रणका लागि पछिल्लो समय निगरानी अझ कडा बनाइएको सशस्त्र प्रहरीले जनाएको छ ।
