जनकपुरधाम । धनुषाको लक्ष्मीनियाँ गाउँपालिकामा करिब दुई अर्ब रुपैयाँ लगानीमा पाँचतारे होटल निर्माण हुने भएको छ ।
चितवनमा रोयल टुलिप रिर्सोट सञ्चालन गरेका गैरआवासीय नेपाली संघका पुर्वउपाध्यक्ष रामेश्वर शाहको अव जनकपुरधाममा मिथिला हस्पिटालिटीको नाममा सेवा विस्तार गर्न लागेका हुन् । मिथिला होस्पिटालिटी प्रालि.को पहलमा निर्माण हुन लागेको उक्त होटलको शिलान्यास सोमबार मधेश प्रदेशका मुख्यमन्त्री कृष्ण प्रसाद यादव, प्रतिनिधि सभा सदस्य मनिष झा, उद्योगपति उपेन्द्र महतोले संयुक्त रूपमा गरेका छन् ।
लक्ष्मीनियाँ गाउँपालिका–१ मा, सिक्स लेन सडकछेउ र भाटभटेनी सुपरमार्केट नजिक करिब सवा दुई बिघा क्षेत्रफलमा होटल निर्माण गरिनेछ । प्रालिका अध्यक्ष रामेश्वर शाहले का अनुसार होटलमा १२४ वटा आधुनिक कोठा रहनेछन्, जसमा ८ वटा विलासी सुइटसमेत समावेश हुनेछन् । करिब १ लाख २० हजार वर्गफिट निर्मित क्षेत्रफल रहने यस परियोजना तीन वर्षभित्र सम्पन्न गर्ने लक्ष्य राखिएको उनले बताए ।
होटलमा क्यासिनो, सभा तथा बैंक्वेट हल, व्यापार केन्द्र, बहुउद्देश्यीय स्विमिङ पूल, स्पा, हेल्थ क्लब, टेनिस कोर्ट, एम्फीथिएटर, ईभी चार्जिङ स्टेशन र बालबालिकाका लागि खेल क्षेत्रजस्ता आधुनिक सुविधा रहनेछन् । परियोजना सम्पन्न भएपछि प्रत्यक्ष रूपमा करिब १५० जनाले रोजगारी पाउने र स्थानीय स्तरमा अप्रत्यक्ष रोजगारी तथा आर्थिक गतिविधि समेत बढ्ने सञ्चालक शाहको दावि छ ।
लगानीकर्ताहरूका अनुसार यो परियोजनाले जनकपुरधामलाई पर्यटन तथा वैवाहिक गन्तव्यका रूपमा विकास गर्न महत्त्वपूर्ण योगदान पु¥याउनेछ । यसअघि प्रधानमन्त्री बालेन्द्र शाह(बालेन)ले पनि जनकपुरलाई पर्यटन हबको रूपमा विकास गर्ने अवधारणा अघि सारेका थिए, जसलाई यो लगानीले थप टेवा दिने विश्वास लिइएको छ ।
कार्यक्रममा मुख्यमन्त्री यादवले यस्ता होटलहरुको विकासले प्रदेशमा पर्यटकीय उद्योगमा टेवा पुग्ने बताए । मधेशमा पर्यटन व्यवसायको सम्भावना धेरै रहेको उल्लेख गर्दै उनले प्रदेश सरकारले पर्यटन प्रवर्धनमा लागानी गरिरहेको बताए ।
कार्यक्रममा सांसद मनिष झाले लगानीकर्ताको सुरक्षामा राज्य गम्भीर हुनुपर्ने धारणा राख्दै अब मधेशमा लगानी वातावरण सुरक्षित हुने विश्वास व्यक्त गरे। उनले विगतमा लगानीकर्ताले भोगेका अनावश्यक अवरोधहरू दोहोरिन नदिने प्रतिबद्धता जनाए ।
त्यसैगरि, उद्योगपति महताले नेपालको सांस्कृतिक र प्राकृतिक सम्पदालाई आर्थिक समृद्धिसँग जोड्नुपर्ने बताए । उनले नेपालका मौलिक विशेषताहरू अन्य देशहरूले ठूलो लगानी गरेर पनि सजिलै सिर्जना गर्न नसक्ने उल्लेख गरे ।
