जनकपुरधाम । पर्सा राष्ट्रिय निकुञ्जको कोर क्षेत्रबाट १६६ किलोग्राम गाँजासहित दुई जनालाई नेपाली सेनाले पक्राउ गरेको छ ।
नेपाली सेनाका अनुसार निकुञ्ज क्षेत्रमा नियमित सुरक्षा गस्ती गरिरहेको श्री सबुज गणअन्तर्गत सुरक्षा पोष्ट प्रतापपुरबाट खटिएको टोलीले आषाढ २२ गते बगई खोलानजिक शंकास्पद अवस्थामा रहेका दुई जनालाई नियन्त्रणमा लिएको हो ।
जाँचका क्रममा उनीहरूको साथबाट १६६ किलोग्राम गाँजा बरामद भएको सेनाले जनाएको छ । पक्राउ पर्नेमा मकवानपुरको राक्सिराङ गाउँपालिका–३ पलासेका ५४ वर्षीय विक्रम सिंतान र ४८ वर्षीय गोकर्ण मोक्तान रहेका छन् ।
बरामद गरिएको गाँजा तथा पक्राउ परेका दुवै जनालाई थप अनुसन्धान तथा कानुनी कारबाहीका लागि पर्सा राष्ट्रिय निकुञ्जका कर्मचारीको रोहबरमा इलाका प्रहरी कार्यालय मनहरी, मकवानपुरमा बुझाइएको नेपाली सेनाले जनाएको छ । प्रहरीले गाँजा कहाँबाट ल्याइएको थियो, कहाँ पु¥याउने तयारी थियो तथा यस घटनामा अन्य व्यक्तिको संलग्नता रहेको वा नरहेको विषयमा अनुसन्धान भइरहेको जनाएको छ ।
पर्सा राष्ट्रिय निकुञ्ज मकवानपुर, बारा र पर्सा जिल्लामा फैलिएको संरक्षित क्षेत्र हो। सुरक्षा निकायका अनुसार निकुञ्ज क्षेत्रमा लागूऔषध ओसारपसार लगायत अवैध गतिविधि नियन्त्रण गर्न नेपाली सेना, नेपाल प्रहरी र निकुञ्ज प्रशासनले नियमित संयुक्त गस्ती तथा निगरानी सञ्चालन गर्दै आएका छन् ।
सम्बन्धित खबर
