जनकपुरधाम । आईसीसी पुरुष टी–२० विश्वकप क्रिकेट प्रतियोगिताको पहिलो खेलमै नेपालले साहसिक प्रदर्शन गर्दै बलियो इङ्ल्यान्डलाई कडा चुनौती दिएको छ ।
मुम्बईस्थित वानखेडे मैदानमा भएको प्रतिस्पर्धात्मक खेलमा नेपाल ४ रनले पराजित हुन पुगेको हो ।
टस हारेर पहिले ब्याटिङ गरेको इङ्ल्यान्डले निर्धारित २० ओभरमा ७ विकेट गुमाउँदै १८४ रनको प्रतिस्पर्धात्मक स्कोर बनायो ।
कप्तान ह्यारी ब्रुकले ३२ बलमा ५३ रन बनाए भने जेकोब बेथेलले ३५ बलमा ५५ रनको अर्धशतकीय पारी खेले । विल ज्याक्स ३९ रनमा अविजित रहे ।
नेपालका बलरमध्ये दीपेन्द्र सिंह ऐरी र नन्दन यादवले दुई–दुई विकेट लिए । शेर मल्ल र सन्दीप लामिछानेले समान एक–एक विकेट हात पारे ।
१८५ रनको लक्ष्य पछ्याएको नेपालले २० ओभरमा ६ विकेट गुमाउँदै १८० रन जोड्यो । अन्तिम ओभरसम्म जितको सम्भावना जीवित रहे पनि आवश्यक रन पूरा गर्न नसक्दा नेपाल हार्न बाध्य भयो ।
नेपालका लागि दीपेन्द्र सिंह ऐरीले ४४ रनको महत्वपूर्ण योगदान दिए । कप्तान रोहित पौडेलले ३९ रन बनाए भने कुशल भुर्तेलले २९ रन जोडे ।
लोकेश बम ३९ रनमा अविजित रहँदै अन्तिमसम्म संघर्ष गरे ।बलिङतर्फ इङ्ल्यान्डका लियाम डासनले दुई विकेट लिए । विल ज्याक्स, साम करन, जोफ्रा आर्चर र लुक वुडले समान एक–एक विकेट हात पारे ।
समूह ‘सी’ मा रहेको नेपालले वेस्ट इन्डिज, इटाली र स्कटल्यान्डसँग प्रतिस्पर्धा गर्न बाँकी छ ।
पहिलो खेलमा हार बेहोरे पनि नेपालले देखाएको उत्साहजनक प्रदर्शनले समर्थकहरूलाई आगामी खेलप्रति आशावादी बनाएको छ ।
सम्बन्धित खबर
