जनकपुरधाम । जनकपुरधाममा सुत्केरी गराउने क्रममा फेरि एक महिलाको मृत्यु भएको छ । घटनापछि चिकित्सकको लापरवाहीका कारण मृत्यु भएको आरोप लगाउँदै मृतकका आफन्तले धनुषा अस्पताल घेराउ गरेका छन् । अस्पतालमा तनावपूर्ण अवस्था सिर्जना भएपछि ठूलो संख्यामा प्रहरी परिचालन गरिएको छ ।
सिरहा नगरपालिका–२३ की स्थायी बासिन्दा तथा हाल जनकपुरधाम–१६, कपिलेश्वरमा बसोबास गर्दै आएकी २३ वर्षीया कल्याणी पासवान हुन् । उनी आठ महिनाको गर्भवती थिइन्। पेट दुख्ने समस्या भएपछि उनलाई सोमबार जनकपुरधाम–२ स्थित धनुषा अस्पतालमा भर्ना गरिएको थियो ।
अस्पतालकी चिकित्सक डा. स्वाती जयसवालका अनुसार अस्पतालमा भर्ना हुँदा नै गर्भमा रहेको शिशुको मृत्यु भइसकेको थियो । शल्यक्रिया नगरी सामान्य (नर्मल) प्रसूति प्रक्रियामार्फत मृत शिशुलाई बाहिर निकाल्ने निर्णय गरिएको र त्यसअनुसार उपचार अघि बढाइएको उनले बताएकी थिइन् ।
मृतका श्रीमान सतेन्द्र पासवानका अनुसार दुई दिनको प्रतीक्षापछि बुधबार विहान १० बजे मृत शिशुको सामान्य प्रसूति गराइएको थियो । तर, त्यसको केहीबेरमै कल्याणीको यौनाङबाट अत्यधिक रक्तस्राव सुरु भएको थियो । उनका अनुसार अस्पतालले तत्काल तीन पोका रगत चढाएको थियो। तर स्वास्थ्य अवस्था थप जटिल बन्दै गएपछि अस्पतालले आजै दिउँसो २ बजे आफ्नै व्यवस्थामा एम्बुलेन्समार्फत थप उपचारका लागि विराटनगरस्थित एक अस्पतालमा रिफर गरेको थियो ।
विराटनगर पुगेलगत्तै चिकित्सकहरूले कल्याणीलाई मृत घोषणा गरेका थिए। मृतक कल्यणीले यस एक छोरीलाई नर्मल रुपमै जन्म दिईथिईन ।
कल्याण्ीको मृत्यु चिकित्सकको लापरवाहीका कारण भएको आरोप लगाउँदै आक्रोशित परिवारजनले धनुषा अस्पतालमा विरोध प्रदर्शन गरेका छन् । उनीहरूले अस्पतालमा तोडफोडको प्रयास गरेपछि प्रहरीले हस्तक्षेप गर्दै अवस्था नियन्त्रणमा लिएको थियो । हाल अस्पताल परिसर तथा आसपासको क्षेत्रमा उल्लेख्य संख्यामा प्रहरी परिचालन गरिएको छ ।
अस्पताल अगाडि मृतकका आफन्त तथा स्थानीयले घेराउ जारी राखेका छन्। घटनापछि त्यस क्षेत्रको अवस्था तनावपूर्ण बनेको छ । यस विषयमा उपचारमा संलग्न डा. स्वाती जयसवालसँग प्रतिक्रिया लिन मोबाइल फोनमार्फत सम्पर्क गर्ने प्रयास गरिएको भए पनि उनको फोन सम्पर्कमा आउन सकेन ।
