नेपाली टिममा रहेका कतिपय खेलाडी महबुब आलम र उनकै पुस्ताका क्रिकेटरहरुलाई पछ्याउँदै यो खेलमा आएका थिए । नेपाली क्रिकेटका सफल अलराउण्डर आलमले २००८ मा मोजाम्बिकविरुद्ध १० विकेट लिएर कीर्तिमान बनाएका थिए । त्यसयता नेपाली क्रिकेटमा उनको नाम बारम्बार आइरह्यो । १९ वर्षका आदिल धेरैका साथी हुन् भने सिनियरहरुका भाइ । उनीहरु नै स्पट फिक्सिङमा मुछिएपछि धेरै क्रिकेटर झस्किएका छन् ।स्पट फिक्सिङमा मुछिएपछि प्रहरी हिरासतमा रहेका मेहबुब आलम र आदिल अन्सारी स्पट फिक्सिङबारे नेपाल प्रहरीको केन्द्रीय अनुसन्धान ब्यूरो (सीआईबी)ले अनुसन्धान गरिरहेको छ । सीआईबीले औपचारिक रुपमा त केही बोलेको छैन, तर नेपाल टी–२० मा गरेको प्रदर्शनलाई लिएर केही क्रिकेटरको नाम चर्चा हुने गरेको छ । यसले क्रिकेटरहरुलाई कुनै पनि बेला यस्तो आरोप आफूमाथि पनि लाग्ने त होइन भन्ने त्रास बढेको छ । उनीहरुको मनमा डरले डेरा जमाएको छ ।