काठमाण्डौ ।आईसीसी क्रिकेट विश्वकप लिग टुअन्तर्गत अन्तिम त्रिदेशीय सिरिजमा नेपालले यूएईविरुद्ध सानदार जित निकालेको छ । आइतबार भएको खेलमा नेपालले यूएईलाई १७७ रनले पराजित गरेको हो ।
यूएईविरुद्ध फराकिलो रनको जित निकालेसँगै नेपालले एकदिवसीय अन्तर्राष्ट्रिय क्रिकेटको मान्यतालाई जोगाएको छ । लिग टुमा चौथो स्थानमा उक्लिएसँगै नेपालले ओडीआई मान्यतालाई कायमै राख्न सफल भएको हो ।
यूएईविरुद्धको जितसँगै ३४ खेलबाट ३६ अंक बनाएको नेपाल लिग टुको चौथो स्थानमा उक्लियो । योसँगै नेपालको एकदिवसीय अन्तर्राष्ट्रिय मान्यता जोगिएको हो । यता, यूएईले लिग टुबाट एकदिवसीय मान्यतालाई जोगाउने अवसर गुमाएको छ ।
अब एकदिवसीय अन्तर्राष्ट्रिय मान्यता कायम गर्न यूएईले विश्वकप छनोटको प्लेअफमा जर्सी र क्यानाडामध्ये एकलाई उछिन्नुपर्ने हुन्छ । यता, नेपालसँग यूएई हारेसँगै अमेरिकाले पनि एकदिवसीय अन्तर्राष्ट्रिय मान्यतालाई कायमै राख्न सफल भएको छ । अमेरिकाको ३६ खेलबाट ३५ अंक छ । पराजित यूएईको भने ३४ खेलबाट ३१ अंक छ ।
नेपालको चमत्कारी बलिङ
नेपालले दिएको २४९ रनको चुनौती पछ्याउँदै ब्याटिङ गरेको यूएईले २२।५ ओभरमा सबै विकेटको क्षतिमा ७१ रन मात्रै बनाउन सक्यो ।
नेपाली बलरले किफायती बलिङ गरे । यसअघि लगातार बेन्चमा बस्दै आएका ललितनारायण राजवंशीले उत्कृष्ट प्रदर्शन गरे । ओपनिङ बलिङ गरेका ललितले आफ्नो लगातार दुई ओभरमा विकेट मेडन राखे । ललितले ७।५ ओभर बलिङ गर्दै दुई ओभर मेडन राखेर २० रन खर्चिएर पाँच विकेट लिए । त्यस्तै, सन्दीप लामिछानेले दुई, सोमपाल कामी, गुल्सन झा र दीपेन्द्रसिंह ऐरीले समान १–१ विकेट लिए ।
यूएईका तीन खेलाडीले दोहोरो अंकमा रन बनाए । यूएईका ब्याटर एकपछि अर्को आउट भएपछि नेपालले सानदार जित निकालेको हो । यूएईका आयन अफ्जल खानले २९, अश्वन्थ भालथापाले १४ र कार्थिक मैयाप्पनले ११ रन बनाए ।
नेपालको ब्याटिङ, मिडिल अर्डरको भर
यसअघि टीयू क्रिकेट मैदानमा टस जितेर ब्याटिङ गरेको नेपालले ४९।२ ओभरमा सबै विकेटको क्षतिमा २४८ रन बनाएपछि यूएईले प्रतिस्पर्धात्मक लक्ष्य पाएको हो । नेपालका लागि कप्तान रोहितकुमार पौडेलले उत्कृष्ट प्रदर्शन गरे । उनले ११२ बलमा ९ चौकाको मद्दतमा ७७ रन बनाए । एकदिवसीय अन्तर्राष्ट्रिय क्रिकेटमा रोहितले आठौँ अर्धशतक बनाए । रोहित नेपालको सर्वाधिक अर्धशतक बनाउने खेलाडी पनि बनेका छन् । यसअघि आशिफ र ज्ञानेन्द्र मल्लले एकदिवसीय क्रिकेटमा ७–७ अर्धशतक बनाएका छन् ।
रोहितले पाँचौँ विकेटका लागि आरिफ शेखसँग ८६ रनको साझेदारी गरे । यसअघि उनले चौथो विकेटका लागि भीम शार्कीसँग ५४ रनको साझेदारी गरेका थिए । आरिफ शेखले ५२ बलमा पाँच चौका प्रहार गर्दै ४३ रन बनाएर आउट भए ।
गुल्सन झा ३२ बलमा तीन छक्का र एक चौकाको मद्दतमा ३७ रन बनाएर आउट भए । दीपेन्द्रसिंह ऐरीले १९ बलमा तीन चौका र दुई छक्काको मद्दतमा ३४ रन बनाए । यसअघि भीम सार्की २९, कुशल मल्ल ९, कुशल भुर्तेल आठ र आशिफ शेख शून्यमा आउट भएका थिए । २२ रन हुँदा तेस्रो विकेट गुमाएको नेपालले सम्हालेर खेल्दै यूएईलाई प्रतिस्पर्धात्मक लक्ष्य दिएको हो ।
यूएईका आयन अफ्जल खान, रोहन मुस्तफा, जाहोर खान र जावार फरिदले समान २(२ विकेट लिए ।
सम्बन्धित खबर
