काठमाडौं । नेपाली कांग्रेसका महामन्त्री गगनकुमार थापा (Gagan Thapa) ले तत्काल काठमाडौं महानगरपालिका (kathmandu metropolitan) सँग संवाद गर्न सरकारलाई सुझाव दिएका छन् । प्रतिनिधिसभा (Parliament) को आजको बैठकको आकस्मिक बैठकमा उनले कुनै विलम्ब र आग्रह नगरिकन कामपासँग छलफल गर्न प्रधानमन्त्री (Primeminister) पुष्पकमल दाहाल (Pushpa Kamal Dahal) ‘प्रचण्ड’लाई सुझाव दिए । ‘सिंहदरबारलगायतका स्थानबाट फोहोर नउठाउने महानगरको निर्णयका सम्बन्धमा तत्काल संवाद गरियोस् जुन जुन विषय अहिले सल्टाउनुपर्ने हो सल्ट्याइयोस्, जायज माग पूरा गरियोस्’, उनले भने । उनले काठमाडौंका जनप्रतिनिधिलाई यस प्रक्रियामा सम्मिलित गराउन समेत आग्रह गरे ।

काठमाडौं महानगरलाई व्यवस्थित बनाउने आफ्नो योजनामा सङ्घीय सरकारले पर्याप्त सहयोग नगरेको भन्दै कामपाले सिंहदरबारलगायत स्थानबाट फोहर उठाएको छैन । ‘काठमाडौँ महानगरापालिकासँग देखिएको टकरावलाई सम्बोधन गर्न आजै प्रधानमन्त्रीले पहलकदमी लिएर कामपासँग संवाद गरियोस्, यो विषय टुङ्ग्याइयोस्, सँगसँगै यो विषय अहिले टुङ्गियो भनेर यतिकै नछाडियोस्, सङ्घीय सरकारले बनाउनुपर्ने कानुन संसद्मा ल्याइयोस् । हामी काम गर्न तयार छौं’, उनले भने ।  बागदरबार र सिंहदरबारबीच टकराव देखिएको भन्दै उनले भने, ‘स्थानीय सरकारले आफ्नो असहमति प्रकट गर्दै गर्दा अत्यावश्यक सेवा अवरोध गरेर आफ्नो माग सुनुवाइ गराउने शैली, भाषा, लवज ठीक कि बेठीक यो विषयमा बहस गरौंला ।’