काठमाडौं । सन्दीप लामिछानेको अलराउन्ड प्रदर्शन गरेपछि नेपालले समूह चरणको आफ्नो अन्तिम खेलमा कतारलाई पराजित गरेको छ । बिहीवार त्रिवि अन्तरराष्ट्रिय क्रिकेट मैदानमा सम्पन्न समूह ‘ए’अन्तर्गतको समूह चरणको अन्तिम खेलमा नेपालले कतारलाई ६८ रनले हरायो ।
१५८ रनको विजयी लक्ष्य पछ्याएको कतारको आधा टोली लामिछानेको बलिङमा धराशयी बन्यो । ९.१ ओभर बलिङ गरेका लामिछानेले १४ रन खर्चिएर ५ विकेट लिएपछि कतार ८९ रनमै समेटियो । नेपालका लागि सोमपाल कामीले ३ र ललित राजवंशीले २ विकेट लिए ।
त्यसअघि टस हारेर ब्याटिङ गर्न आएको नेपाल १५७ रनमै अलआउट भएको थियो । यो स्कोर जारी प्रतियोगितामा अहिलेसम्म नेपालले बनाएको सबैभन्दा कम हो । नेपालले उक्त स्कोरमा पुर्याउन लामिछानेले नै सर्वाधिक रन जोडेका थिए । उनले ५८ बलमा ४२ रन बनाएका थिए ।
जितसँगै नेपाल समूह ‘ए’को विजेता बनेको छ । प्रतियोगिताका ३ खेलमा जित र १ मा अंक बाँडेको नेपालको ४ खेलबाट ७ अंक बनेको छ । यो समूहबाट उपविजेता हुँदै ओमान पनि सेमिफाइनलमा पुगिसकेको छ । नेपालले सेमिफाइनलमा अर्काे समूहको उपविजेतासँग खेल्नेछ । उक्त समूहको उपविजेताको टुंगो भने हङकङ र कुवेतबीचको खेलले निर्धारण गर्नेछ । उक्त खेल अहिले मुलपानी क्रिकेट मैदानमा भइरहेको छ ।
उक्त खेल हङकङले जितेमा नेपालले सेमिफाइनलमा युएईसँग प्रतिस्पर्धा गर्नेछ । यो अवस्थामा हङकङको ७ अंकसहित समूह विजेता बन्नेछ भने युएई ६ अंकसहित उपविजेता बन्नेछ । आजको खेल कुवेतले जितेमा भने कुवेत र युएईमध्ये एक टोलीसँग नेपालको सेमिफाइनल भिडन्त हुनेछ । यो अवस्थामा यी दुवै टोलीको समान ६ अंक हुनेछ । हङकङ ५ अंकसहित प्रतियोगिताबाट बाहिरिनेछ ।
यो अवस्थामा जितको अन्तरले समूह विजेता उपविजेताको टुंगो लाग्नेछ । कुवेतले सामान्य अन्तरमा खेल जितेमा ऊ समूह उपविजेता हुनेछ । कुवेतलाई समूह विजेता बन्न विशाल अन्तरले खेल जित्नुपर्नेछ । तर, हङकङ र कुवेतबीचको खेल हेर्दा यो सम्भावना सकिएको छ ।
२७३ रनको विजयी लक्ष्य पछ्याइरहेको हङकङले ३२ ओभरको खेल सकिँदा ३ विकेटको क्षतिमा १४७ रन बनाइसकेको छ ।
खेल टाइ भएको अवस्थामा भने सेमिफाइनलमा नेपालकाे भेट हङकङसँग हुने देखिन्छ । यो अवस्थामा युएई र हङकङको समान ६ अंक हुनेछ । र, कुवेत ५ अंकसहित प्रतियोगिताबाट बाहिरिनेछ ।
सम्बन्धित खबर
