जनकपुरधाम । कात्तिक कृष्ण औँसीका दिन आज धनधान्य र समृद्धिकी देवी लक्ष्मीको पूजा गरी तिहारको तेस्रो दिन लक्ष्मी पूजा पर्व मनाइँदैछ ।
दिपावलीको अवसरमा जनकपुरधामलाई दुल्ही झै सिङ्गारिएको छ । स्थानीय व्यापारीहरु विहानदेखि पसल, व्यापारिक प्रतिष्ठानको सरसफाई तथा त्यसलाई सजाउन विभिन्नि किसिमका इलेट्रिक बल्फहरु लगाईरहेका देखिन्छ । त्यसैगरि, आज साँझ पसलको अगाडी केराका डफोर(रुख)मा बाँसको चिरपटलाई लौरो बनाई त्यसमा माटोको दिउरी राख्न अहिलेदेखि नै व्यापारीहरुले तयारी गरिहेका छन् ।
त्यसैगरि, आज विहानैदेखि फलफुल पसल तथा मिटाईका पसलहरुमो सर्वसधारणहरुको घुईचो लागेको छ । त्यसैगरि, धनकी देवी लक्ष्मीसहितका देविदेवताको तस्वीर खरिद गर्न सर्वसधारणको भिडभाड लागेको छ ।
आजका दिन घर वरिपरि सरसफाइ गरी सिङ्गारेर बत्तीले झिलिमिली पारी लक्ष्मी पूजा गरेमा लक्ष्मीले सधैँ बास गर्छिन् र ऐश्वर्य प्रदान गर्छिन् भन्ने धार्मिक विश्वास रहिआएको छ । यसै विश्वासका कारण आज घरघरमा दीपमालिकासहित दीपावली गरिन्छ । घरमा लक्ष्मी प्रवेश गरून् भनी आँगन वा चोकदेखि ढुकुटीसम्म लक्ष्मीको पाइला अङ्कित गरिन्छ ।
यसरी अङ्कित गरिएको पाइलामा कमलको फूलको शय्या बनाइदिएमा त्यस घरलाई लक्ष्मीले कहिल्यै छोड्दिनन् भन्ने विश्वास रहेको छ । लक्ष्मी पूजा गरिसकेपछि मध्यरातमा महिलाले आँगनबाट भित्रसम्म दुःख, दरिद्र हटी सुखशान्ति भित्रियो, लक्ष्मी स्थिर भइरहून् भन्ने उद्देश्यले नाङ्लो ठटाउँदै प्रवेश गर्ने शास्त्रीय विधि रहेको धर्म गुरुहरु बताउछन् ।
