जनकपुरधाम । यातायात व्यवस्था कार्यालय जनकपुरधामबाट प्रहरीले तीन जना विचौलियालाई निणन्त्रणमा लिएको छ ।
पक्राउ पर्नेमा जनकपुरधाम उपमहानगरपालिका–२ निवासी २२ वर्षीय अंकित कुमार साह, सर्लाहीको गोडैता नगरपालिका–६ का ३० वर्षीय चिन्टु कुमार सिंह तथा धनुषाधाम नगरपालिका–३ निवासी २१ वर्षीय राजेश साह रहेका छन् र्। सेवाग्राहीलाई हैरानी दिएको आरोपमा प्रहरीले उनीहरुलाई पक्राउ गरेको हो ।
जिल्ला प्रहरी कार्यालय धनुषाका अनुसार यातायात कार्यालयमा आउने सेवाग्राहीसँग अनावश्यक झन्झट सिर्जना गर्दै आर्थिक लाभ लिन खोजिएको भन्ने विशेष सूचनाका आधारमा शुक्रबार साँझ उनीहरूलाई नियन्त्रणमा लिइएको हो ।
जिल्ला प्रहरी कार्यालय धनुषाका प्रहरी प्रवक्ता प्रहरी नायव उपरीक्षक गणेशबहादुर बमले कार्यालय परिसर आसपास सक्रिय भई सेवाग्राहीलाई प्रभावित पार्ने गतिविधि भइरहेको सूचनापछि निगरानी बढाइएको बताए । सोही क्रममा तीन जनालाई पक्राउ गरिएको उनले जानकारी दिए । पक्राउ परेकामाथि आवश्यक अनुसन्धान भइरहेको उनले बताए ।
