जनकपुरधाम । महोत्तरीको सोनमा गाउँपालिकाका प्रमुख प्रशासकीय अधिकृत श्रीदेव यादवविरुद्ध घुस लिएको आरोपमा भ्रष्टाचार मुद्दा दायर गरिएको छ ।
अख्तियार दुरुपयोग अनुसन्धान आयोगले सडक ढलान योजनाको भुक्तानी प्रक्रिया अघि बढाइदिने भन्दै सेवाग्राहीसँग ७२ हजार रुपैयाँ घुस लिएको आरोपमा यादवविरुद्ध शुक्रबार विशेष अदालतमा आरोपपत्र दायर गरेको जनाएको छ ।
आयोगका अनुसार योजनाको भुक्तानीसम्बन्धी काम सम्पन्न गराइदिने नाममा सेवाग्राहीसँग रकम मागिएको सूचनाका आधारमा खटिएको अख्तियारको बर्दिवासस्थित टोलीले यादवलाई ७२ हजार रुपैयाँ घुस रकम लिइसकेको अवस्थामा नियन्त्रणमा लिएको थियो ।
घटनापछि आयोगले विस्तृत अनुसन्धान अघि बढाएको थियो । अनुसन्धानबाट घुस लेनदेन भएको पुष्टि भएपछि भ्रष्टाचार निवारण ऐन, २०५९ बमोजिम बिगो ७२ हजार रुपैयाँ कायम गरी सोही बराबर जरिवाना तथा कैद सजायको मागदाबीसहित विशेष अदालतमा मुद्दा दायर गरिएको आयोगले जनाएको छ ।
स्थानीय तहमा विकास निर्माण योजनाको कार्यान्वयन तथा भुक्तानी प्रक्रियामा हुने अनियमिततामाथि निगरानी बढाइरहेको अख्तियारले पछिल्लो समय घुस तथा भ्रष्टाचारसम्बन्धी उजुरीका आधारमा कारबाहीलाई तीव्रता दिएको छ ।
सम्बन्धित खबर
