जनकपुरधाम । होटल पौवाले भोटेकोशि नदिको आएको बिनाशकारि बाढीबाट प्रभावित नागरिकको राहत, उद्धार तथा पुनःस्थापनाका लागि प्रधानमन्त्री दैवी प्रकोप उद्धार कोषमा ११ लाख रुपैयाँ सहयोग गरेको छ ।
होटल पौवाका अध्यक्ष दुर्गाप्रसाद भण्डारीले बिहीबार चितवनका प्रमुख जिल्ला अधिकारी गणेश अर्याललाई ११ लाख रुपैयाँको चेक हस्तान्तरण गरेका हुन् । चेक बुझ्दै प्रमुख जिल्ला अधिकारी अर्यालले भोटेकोशी बाढीपछिको विपद्को समयमा राहत तथा पुनःस्थापनाका लागि होटल पौवाले गरेको सहयोगप्रति आभार व्यक्त गरे । उनले विपद्बाट प्रभावित नागरिकको उद्धार, राहत तथा पुनःस्थापनामा निजी क्षेत्रबाट हुने सहयोग महत्वपूर्ण हुने बताए ।
होटल पौवाका प्रबन्ध निर्देशक विष्णु ज्ञवालीले पौवाका सञ्चालक, व्यवस्थापक तथा कर्मचारीले समेत आफ्नो तर्फबाट रकम संकलन गरी विपद्मा परेका नागरिकलाई सहयोग गरेको बताए । ‘रकम ठूलो नभए पनि अहिले देश महाविपत्तिको अवस्थाबाट गुज्रिरहेका बेला हाम्रो सानो सहयोगले पनि प्रभावित नागरिकलाई केही राहत पुग्ने विश्वास गरेका छौँ,’ उनले भने ।
होटल पौवाले व्यवसायसँगै सामाजिक उत्तरदायित्वलाई पनि आफ्नो कार्यक्षेत्रको महत्वपूर्ण हिस्सा मान्दै आएको जनाएको छ । पौवाले यसअघि पनि विपद्, सामाजिक सेवा तथा समुदायसँग सम्बन्धित विभिन्न गतिविधिमा सहयोग गर्दै आएको जनाएको छ । चेक हस्तान्तरण कार्यक्रममा होटल पौवाका सञ्चालक समितिका सदस्यहरूको उपस्थिति थियो ।
सम्बन्धित खबर
