काठमाडौं । पोर्चुगलका फरवार्ड क्रिस्टियानो रोनाल्डोले साउदी अरेबियाको साउदी प्रो लिग विश्वकै शीर्ष पाँच लिग बन्न सक्ने बताएका छन् ।यदि साउदी लिगले अझ धेरै ठूला नामहरुलाई आकर्षित गर्न सके शीर्ष पाँच लिग बन्न सक्ने उनको भनाइ छ । ३८ वर्षीय रोनाल्डो हाल अल नासेरबाट साउदी प्रो लिग खेलिरहेका छन् ।
पूर्वाधारमा केही सुधारको आवश्यकता औल्याँदै उनले भने, ‘लिग धेरै राम्रो छ । मेरो विचारमा अझै धेरै अवसरहरु छन् । लिग प्रतिस्पर्धात्मक छ । हामीसँग धेरै राम्रा टिम र धेरै राम्रा अरेबियन खेलाडी छन् । तर उनीहरुले पूर्वाधारमा केही सुधार गर्नुपर्छ । रेफ्री र भिएआरमा पनि सुधार गर्नुपर्छ ।’रोनाल्डोले आफू साउदी लिगमा खुशी रहेको र अबको केही वर्षमा साउदी लिग राम्रो हुने पनि बताए । ‘म यहाँ खुशी छु र निरन्तरता दिन चाहन्छु । मेरो विचारमा यदि उनीहरुले राम्रो काम गर्दै गए अबको पाँच वर्षमा मेरो विचारमा साउदी लिग विश्वकै शीर्ष पाँचमध्ये पर्छ ।’
पाँच पटकको बालोन डे’ओर विजेता रोनाल्डो गत डिसेम्बरमा अल नासेरमा आबद्ध भएका थिए । उनले पहिलो सिजन पूरा गर्दै छन् । उनको सम्झौता २०२५ सम्म छ ।रोनाल्डोले साउदी लिगमा डेब्यु सिजनमा अल नासेरका लागि १६ खेल खेल्दै १४ गोल गरेका थिए ।गत नोभेम्बरमा म्यानचेष्टर युनाइटेडमा आफ्नो दोस्रो कार्यकाल सकिएपछि रोनाल्डो साउदी लागेका हुन् ।
सम्बन्धित खबर
