रौतहटमा भवन बनेको तीन वर्ष भई सक्दा पनि हाल सम्म प्रसूति गृह सञ्चालनमा आएको छैन । गुजरा नगरपालिका २ को कटानी बजारमा नेपाल सरकार, गुजरा नगरपालिका तथा नेपाल ग्रामीण पुनर्निर्माण संस्थाको लगानीमा बनेको भवन प्रसूति सेवा सुरु नभएका कारण स्थानीयवासीहरु बाध्य भएर अन्यत्र जानुपर्ने बाध्यता छ ।
रंगपुर स्वास्थ्य चौकी मातहतमा रहेको प्रसूति गृह भवन करिब ४१ लाखको लागतमा बनेको हो । ४१ लाखमा तीन कोठे भवन मात्र बनेको र त्यसमै आर्थिक अनियमितता भएको स्थानीयको आरोप छ ।
सो भवनमा प्रसूतिगृह सञ्चालनमा नआएका कारण स्वास्थ्य चौकीको सामान्य काम रंगपुर स्वास्थ्य चौकीबाटै हुने गरेको प्रमुख भुपेन्द्र चौधरीले जानकारी दिए । गुजरा नगरपालिकाले प्रसूति सेवा सञ्चालनका लागि तत्काल पहल गर्नुपर्ने स्थानीयवासीको माग रहेको छ ।
