सामाजिक सञ्जाल टिकटकलाई पूर्णरूपमा प्रतिबन्ध गर्न माग गर्दै अहिले मधेस तातेका छन् । चीनिया एप टिकटक बन्द गर्नुपर्ने माग राख्दै मधेशका दुई जिल्लामा प्रदर्शन भएको छ । प्रदेशको राजधानी जनकपुरधाम र सिरहामा युवाहरुले प्रदर्शन गरेका छन् ।
टिकटकले आफ्नो संस्कृति बिग्रिरहेको, अश्लिलता प्रदर्शन भइरहेको भन्दै युवाहरुले संघर्ष समिति बनाएर प्रदर्शन गरेका छन । ‘टिकटक बन्द गर्नुपर्ने, टिकटकमा अश्लिल भिडियो बनाउनेलाई कार्वाही गर्नुपर्ने, टिकटक भगाउ, आफ्नो संस्कृति बचाऔं’ भन्दै दुबै जिल्लामा प्रदर्शन भएको छ ।
युवाहरुले टिकटक बन्द गर्न भन्दै जिल्ला प्रशासन कार्यालय, जिल्ला प्रहरी कार्यालय र नगरपालिकाको कार्यालयका ज्ञापनपत्रसमेत बुझाएको छ ।टिकटक बन्द संघर्ष समिति सिरहाका संयोजक राजेश यादवले टिकटक प्लेटफर्ममा अश्लिलता बाहेक अन्य केही नदेखिएको र यसले समाजमा विकृति फैलाइरहेकाले बन्द गर्नुपर्ने उनले बताए ।
टिकटकका कारण यौनधन्दा, आत्महत्या, समाजिक विकृति मौलाउने किसिमका गतिविधिहरु बढन थालेपछि चिन्ताको विषय भएको उनले बताए ।यसअघि मधेसका महोत्तरी र रौतहट जिल्लामा समेत ज्ञापनपत्र बुझाइएको थियोे ।
