प्रतिबन्धित लागूऔषध र हतियारसहित सिरहाबाट एक युवकलाई प्रहरीले पक्राउ गरेको छ । सिरहाको कल्याणपुर नगरपालिका वडा नं. २ चतरी बस्ने १९ वर्षीय सुमन कुमार मण्डललाई पक्राउ गरिएको जिल्ला प्रहरी कार्यालय सिरहाले जनाएका छन । शुक्रवार दिउँसो सिरहा नगरपालिका १७ कमला बाँध स्थित ईलाका प्रहरी कार्यालय माडरबाट खटेको प्रहरी टोलीले चेकजाँच गर्ने क्रममा भारतबाट साइकलमा नेपालतर्फ आउदै गरेको युवकलाई चेकजाँत गर्दा लागूऔषध बरामद गरेको छ ।
युवकको साथबाट नाइट्राभेट ट्याब्लेट २६ पिस, डाईजेल्याब ३ एम्पुल, सिरिन्ज १ थान, फलामको तरवार १ थान, फलामको फर्सा १ थान, फाईटर ६ थान, पेस्तोल जस्तो आकारको लाइटर गन १ थान र साईकल १ थान बरामद भएको प्रहरी प्रवक्ता प्रहरी नायव उपरीक्षक सुवास बुढाथोकीले बताए । जिल्ला अदालत सिरहाबाट म्याद लिई यस सम्बन्धमा थप अनुसन्धान भइरहेको प्रहरीले जानकारी गराए ।
