जनकपुरधाम । प्रतिनिधी र प्रदेश सभाको निर्वाचनलाई लक्ष्ति गरि धनुषा जिल्ला भरि आज शनिवारदेखि मदिरा बिक्रीवितरणमा प्रतिबन्ध लगाईएको छ ।
जिल्ला प्रशासन कार्यालय धनुषाले गत शुक्रवार सुचना जारी गर्दै शनिबारदेखि जिल्लाभर मदिरा बिक्री वितरणमा प्रतिबन्ध लगाईएको जानकारी गराएको छ । जिल्लाका सहायक प्रमुख जिल्ला अधिकारी अनुज भण्डारीले प्रतिनिधि तथा प्रदेशसभा सदस्य निर्वाचनलाई स्वच्छ, निष्पक्ष, सुरक्षित तथा भयरहित वातावरणमा सम्पन्न गर्न यस्तो सुचना जारी गरिएको बताए । निर्वाचन सुरक्षा (व्यवस्थापन) निर्देशिका, २०७८ को दफा ६ (थ) मा भएको व्यवस्था, सर्वदलिय–सर्वपक्षिय, समन्वय बैठकबाट भएको निर्णय तथा जिल्ला सुरक्षा समितिको सिफारिश बमोजिम स्थानीय प्रशासन ऐन, २०२८ को दफा ६ अनुसार शनिबारदेखि निर्वाचन सम्बन्धी कार्य सम्पन्न नहुन्जेलसम्म जिल्लाभर मादक पदार्थ ओसारपसार, विक्री वितरण र सेवन गर्न निषेधित गरिएको सुचनामा उल्लेख छ ।
कोही कसैले सुचनाको बर्खिलाप वा निर्वाचन अवधिमा सुचनालाई अवज्ञा गरि मादक पदार्थ ओसारपसार, विक्री वितरण र सेवन गरेको पाइएमा प्रचलित कानून बमोजिम कारवाही गरिने सुचनामा चेतावनी समेत दिईएको छ ।