जनकपुरधाम । महालेखापरीक्षक कार्यालयको कार्यालयले आर्थिक वर्ष २०७८÷७९ को पाँचौ वार्षिक प्रतिवेदन मधेस प्रदेशका प्रदेश प्रमुख हरिशंकर मिश्रलाई हस्तान्तरण गरेको छ ।
नेपालको संविधानको धारा २४१ बमोजिम महालेखापरीक्षकको कार्यालयले प्रदेशको लेखापरीक्षण गरी संविधानको धारा २९४ को उपधारा (३) अनुसार पाँचौ वार्षिक प्रतिवेदन प्रदेश प्रमुख मिश्रलाई बुझाएको हो । महालेखापरीक्षकको कार्यालयले बुझाएको प्रतिवेदनमा मधेस प्रदेशको बेरुजू २.६९ प्रतिशत रहेको छ । मधेश प्रदेशका १४८ कार्यालय÷संस्थाको ४३ अर्ब १० करोड ४३ लाखको लेखापरीक्षण गरिएकोमा १ अर्ब १६ करोड ३३ लाख बेरुजु पाईएको प्रतिवेदनमा उल्लेख छ ।
महालेखापरीक्षकको प्रतिवेदन ग्रहण गर्दै प्रदेश प्रमुख मिश्रले मुख्यमन्त्रीमार्फत प्रदेशसभा तथा समितिमा बुझाइ बेरुजु घटाउने सम्बन्धमा आवश्यक छलफल हुने विश्वास व्यक्त गरे ।
नायव महालेखापरीक्षक रवीन्द्र प्रसाद देवकोटाले प्रदेशको वित्तीय प्रशासन र आर्थिक अनुशासनलाई सवल बनाउन अनुगमन, मूल्याङकन, जिम्मेवारी तथा जवाफदेहिता पालना गर्ने व्यवस्था कार्यान्वयनमा जोड दिनुपर्ने बताए ।