जनकपुरधाम । मधेश प्रदेशमा मुख्यमन्त्री सरोज कुमार यादव नेतृत्वकै सरकारले निरन्तरता पाएको छ ।
शुक्रवार काठमाण्डौमा भएको सत्तारुढ पाँच दलीय गठबन्धनको बैठकमा तत्काल वर्तमान सरकारलाई नै निरन्तरता दिने सहमति भएको हो । उप चुनाव पश्चात नेपाली काँग्रेस, लोकतान्त्रिक समाजवादी पार्टी, जनमत सहितका दलले प्रदेश सरकारको नेतृत्व परिवर्तनको माग गर्दै आएको थियो । सोही विषयमा दलहरु बीच कुरा नमिलेपछि लामो समयदेखि प्रदेश सरकारको विस्तार हुन सकिरहेको थिएन ।
सरकारको विषयमा सहमति भएपछि अव दलहरु बीच मन्त्रालयको भागबण्डा गर्ने जिम्मेवारी मुख्यमन्त्री सरोज कुमार यादवलाई दिइएको छ ।
प्रधानमन्त्री पुष्पकमल दाहाल प्रचण्ड निवास वालुटारमा भएको पाँच दलका शिर्ष नेताहरुको वैठकमा तत्काल मुख्यमन्त्री सरोज कुमार यादव नेतृत्वकै सरकारलाई निरन्तरता दिने सहमति भएको लोकतान्त्रिक समाजवादी पार्टी लोसपाका मधेश प्रदेशका संसदीय दलका नेता अभिराम शर्माले जानकारि दिए । वैठकमा दलहरु बीच आलोपालो सरकारको नेतृत्व गर्ने समेत सहमति भएको उनले बताए ।
दलहरु बीच आलोपालो सरकारको नेतृत्व गर्ने सहमति भएपनि कुन कुन पार्टीले ? कति कति समय सरकारको नेतृत्व गर्ने ? लगायतका विषयमा अर्को वैठकमा निर्णय हुने नेता शर्माले बताए । बैठकमा जनमत पार्टीका प्रतिनिधी सहभागि नभएपनि जनमतलाई पनि सरकारमै राख्ने दलहरु सहमति भएको नेपाली काँग्रेस मधेश प्रदेशका संसदीय दलका नेता कृष्ण प्रसाद यादवले बताए ।
