मधेशका ९ सांसद सम्पर्कमा रहेकाे अशाेक राई पक्षकाे दाबी, के हाेला प्रदेश सरकार ?

LIVE

८५ सुरक्षाकर्मीसहित रसुवा बाढीमा ६ सय भन्दा धेरै सम्पर्कविहिन | ‘मोहम्मद डे’मा जनकपुरधाममा शान्ति र्‍याली | सिकाई प्लसअन्तर्गत क्षमता अभिवृद्धि कार्यशाला सम्पन्न | पाँच वर्षमा जनलोकपालः संवैधानिक आधारमै प्रश्न, करोडौँ खर्च तर उपलब्धि शुन्य | मधेश प्रदेशका कर्मचारीलाई तलव १० प्रतिशत वृद्धि | वष्ठि साहित्यकार डा.राजेन्द्र विलमको राष्ट्रिय सम्मानसहित अन्येष्टि | रासायनिक मल कालोबजारी गर्ने तीन जना पक्राउ | जनकपुरधाममा गृहमन्त्री गुरुङ र आन्दोलनकारीबीच दोस्रो चरणको वार्ता जारि | भ्रष्टाचारले तुहियो ‘मुख्यमन्त्री बेटी पढाऊँ, बेटी बचाऊँ’, किशोरी गुमाए अवसर | बारामा पार्टी कार्यालयलाई लिएर कांग्रेसका दुई समूहबीच झडप |

केन्द्रमा जनता समाजवादी पार्टी विभाजन हुँदा मधेश प्रदेशमा अब के हाेला भन्नेमा चासाे बढेकाे छ । मधेश प्रदेशसभामा जनता समाजवादी पार्टीका १९ सांसद छन् । यी मध्ये अहिलेसम्म कुनै पनि सांसदहरू अशोक राई नेतृत्वको नयाँ दलका पक्षमा खुल्न चाहेका छैनन् ।

केन्द्रमा पार्टी विभाजनको रणनीति गोप्य तरिकाले बनाएकोले पार्टी विभाजनको विषयमा यहाँका सांसदहरू नै आश्चर्यचकित बनेका छन् । पार्टी विभाजनबारे कुनै भनकसमेत नपाएका प्रदेशका सांसदहरूले अहिलेसम्म नयाँ दलबाट कुनै प्रस्ताव पनि नआएकाे बताएका छन् ।

पार्टीको महाधिवेशनको तयारीस्वरुप आजदेखि जनकपुरधाममा जसपाको जनपरिचालन समितिको बिस्तारित बैठक बसेको थियो । बैठकमा प्रदेशका अधिकांश सांसदहरू सहभागी भएका थिए । बैठकमा प्रदेश सांसद तथा मधेश केन्द्रित नेताहरू सहभागी भएको बेलामा केन्द्रमा अशोक राईकाे नेतृत्वको पार्टी विभाजन भएकाे खबर फैलिएको थियाे ।

बैठकका सहभागी भएका जसपा मधेश प्रदेश सचेतक रामअशिष यादवले भने, ‘पार्टी विभाजनबारे मधेशका सांसदहरूलाई कुनै जानकारी थिएन । बैठकमा एक्कासि केन्द्रमा पार्टी विभाजन भयो भनेर हल्ला फैलियो । त्यसपछि केही समयमा लागि बैठक नै अवरुद्ध भयो ।’

केन्द्रमा पार्टी विभाजन भए पनि मधेशमा त्यसको प्रभाव पर्छ जस्तो आफूलाई नलागेकाे उनले बताए । उनले भने, ‘प्रदेशका सांसदहरू पार्टी विभाजनको पक्षमा छैनन् । विभाजनको समर्थन पनि गर्दैनन् । मधेशका सबै साथीहरू विभाजनका विरोधका छाैँ ।’

आफूलाई मन्त्री बनाउन पटक– पटक पार्टी नेतृत्वलाई दबाब दिँदै आएका बाराबाट निर्वाचित प्रदेश सांसद बच्चा राउतले पनि विभाजनकाे पक्षमा नजाने बताए । ‘रामसहाय यादवलाई जिताएर उपराष्ट्रपति बनाउन, सरोजकुमार यादवलाई मुख्यमन्त्रीदेखि पार्टी अध्यक्ष उपेन्द्र यादवलाई बाराबाट निर्वाचित गराउन मेरो भूमिका महत्वपूर्ण रहेको छ । तर पनि मलाई अध्यक्षले मन्त्री बनाएनन् । त्यसको लागि नेतृत्वसँग मेरो असन्तुष्टि छ । तर, पार्टी विभाजनको पक्षमा म छैन ।’

‘प्रदीप यादवजीले पार्टी विभाजनको पक्षमा गएर गल्ती गरेका छन् । अध्यक्ष यादवले नै प्रदीपजीलाई यहाँसम्म पुर्‍याएको हो । एक पटक मन्त्रीसमेत बनाउनुभयो । यस्तो हर्कत् उहाँले गर्नुहाेला भनेर हाम्रो अनुमान थिएन,’ उनले भने ।

यता, जसपाका प्रवक्ता तथा मधेश प्रदेश सांसद मनिष सुमनले त पार्टी नफुटेको दाबी गरे । उनले भने, ‘पार्टी फुटेको होइन । केही साथीहरूले आफ्ना स्वेच्छाले पार्टी परित्याग गरेका हुन् । त्यसकारण यसले पार्टीमा खासै असर पर्दैन ।’

केन्द्रमा देखिएको समस्याको प्रभाव मधेश प्रदेशसहित कुनै प्रदेशका नपर्ने दाबी गर्दै उनले भने,‘प्रदेशमा सबै सांसद साथीहरूको एक मत छ । विभाजनको पक्षमा कोही छैनन् ।’

यता विभाजन भई नयाँ बनेकाे दलका एक नेताले भने १९ जना मध्ये ९ जना सांसद आफूहरूको सम्पर्कमा रहेको दाबी गरे । उनले आफूहरूले मधेशका सांसदहरूलाई विश्वासमै लिएर यस्तो निर्णय गरेकाे दाबी गरे । तर, उनले ती सांसदहरूको नाम भने खुलाउन चाहेनन् ।

दुवै पक्षले आ–आफ्नाे दाबी गरे पनि जसपा विभाजनकाे असर मधेशकाे सत्ता समीकरणमा पनि पर्ने अनुमान गरिएकाे छ । उपेन्द्र यादवले जसपा फुटाउन भूमिका खेलेकाे बदला लिन एमाले र माओवादीलाई सत्ताबाट हटाउन सक्छन् । मधेशमा कांग्रेससित मिलेर गठबन्धन सरकार चलाउने विकल्प उनीसँग खुला छ । किनभने १०७ सदस्यीय मधेश प्रदेशसभामा माओवादी र एमाले मात्रै मिलेर नयाँ सरकारका लागि बहुमत पुग्दैन ।