जनकपुरधाम । चालु आर्थिक वर्ष २०८०।०८१ मा मधेश प्रदेश सरकारले कुल बजेट ५५.७५ प्रतिशत रकम मात्रै खर्च गर्न सकेको छ ।
चालु आर्थिक वर्षमा ४४ अर्ब ११ करोड ४६ लाख ३२ हजार रुपैयाँ रहेकोमा गत असार २४ को मध्यरातिसम्म २४ अर्ब ५९ करोड ४५ लाख ६५ हजार ६३२ रुपैयाँ मात्र खर्च भएको मधेस प्रदेश लेखा नियन्त्रक कार्यालयले जनाएको छ ।
प्रदेश लेखा नियन्त्रक कार्यालयका अनुसार चालु तर्फ १८ अर्ब ५३ करोड ८८ लाख ५८ हजार बजेट विनियोजन भएकोमा ९ अर्ब २९ करोड ७० लाख २ हजार १३७ रुपैयाँ अर्थात ५०.१४९ प्रतिशत मात्रै खर्च भएको छ ।
त्यसैगरी, पुँजीगत तर्फ २५ अर्ब ५७ करोड ५७ लाख ७४ हजार बजेट रहेकोमा १५ अर्ब २९ करोड ७५ लाख ६३ हजार ४९४ रुपैयाँ अर्थात ५९.८१३ प्रतिशत खर्च भएको सो कार्यालयले जनाएको छ ।
गत आर्थिक वर्ष २०७९।०८० मा ४७ अर्ब २ करोड ५० लाख ५२ हजार ११७ रुपैयाँ कुल बजेट रहेकोमा २७ अर्ब ३३ लाख १२ हजार ८८८ रुपैयाँ ५२ पैसा मात्र खर्च भएको थियो ।
