जनकपुरधाम । मधेश प्रदेशका मुख्यमन्त्री सतिश कुमार सिंहले राजीनामा दिएका छन् ।
मुलुकभरि जेन–जी आन्दोलनका क्रममा प्रदर्शनकारीको ज्यान गएको घटनाप्रति दुःख प्रकट गर्दै मुख्यमन्त्री सिंहले मंगलवार सार्वजनिक सञ्जाल मार्फत राजीनामा दिएको घोषणा गरेका छन् ।
जेन जीको आन्दोलनका क्रममा नागरिकको ज्यान गएको घटनाले आफूलाई गहिरो पीडा भएको उल्लेख गर्दै मुख्यमन्त्री सिंहले भने, ‘नागरिकको ज्यानभन्दा ठूलो अरु केही छैन भन्ने अटल विश्वासका साथ, जनताको अधिकार र भविष्यप्रति उत्तरदायी हुँदै म मधेश प्रदेशको मुख्यमन्त्री पदबाट राजीनामा गर्दछु।’
राजीनामा वक्तव्यमा उनले दिवंगत आत्माहरुप्रति श्रद्धाञ्जली अर्पण गर्दै घाइतेहरुको शीघ्र स्वास्थ्य लाभको कामना गरेका छन् । साथै शान्तिपूर्ण आन्दोलन नागरिकको संवैधानिक अधिकार भएको भन्दै समस्या समाधानको बाटो संवाद, आपसी समझदारी र सहकार्य नै हुनेमा विश्वास व्यक्त गरेका छन् ।
सम्बन्धित खबर
