जनकपुरधाम । धनुषा जिल्लामा आगामी निर्वाचनलाई स्वच्छ, निष्पक्ष र मर्यादित बनाउन जिल्ला निर्वाचन कार्यालयले उम्मेदवारहरूलाई निर्वाचन आचारसंहिता कडाइका साथ पालना गर्न स्पष्ट निर्देशन दिएको छ । आचारसंहिता उल्लङ्घन गर्ने उम्मेदवारमाथि कानुनअनुसार कडा कारबाही हुने कार्यालयले चेतावनी दिएको छ ।
जिल्ला निर्वाचन कार्यालयका अनुसार निर्वाचन आचारसंहिता विपरीत गतिविधि गरेमा उम्मेदवारलाई चरणबद्ध रूपमा कारबाही गरिनेछ । पहिलो चरणमा सचेत गराइने, प्रचार सामग्री जफत गरिने र स्पष्टीकरण सोधिने व्यवस्था छ । गम्भीर उल्लङ्घन भएमा एक लाख रुपैयाँसम्म जरिवाना वा उम्मेदवारी खारेजसमेत गर्न सकिने कानुनी प्रावधान रहेको कार्यालयले जनाएको छ ।
आचारसंहिता प्रभावकारी कार्यान्वयन र अनुगमनका लागि धनुषाका सहायक प्रमुख जिल्ला अधिकारी कृष्ण गैरे तथा कोष तथा लेखा नियन्त्रण कार्यालयका प्रमुख बुद्धराम मल्ललाई अनुगमन अधिकृत तोकिएको जिल्ला प्रशासन कार्यालयले जानकारी दिएको छ ।
मुख्य निर्वाचन अधिकृत सुभाषबाबु पुरीले निर्वाचन आचारसंहिता सबै राजनीतिक दलहरूको सहमतिमा बनेको उल्लेख गर्दै उम्मेदवारहरूले यसको पूर्ण पालना गर्नुपर्ने दायित्व रहेको बताए । उनले आचारसंहिता उल्लङ्घनले उम्मेदवारसँगै सम्बन्धित राजनीतिक दलको प्रतिष्ठामा समेत नकारात्मक असर पर्ने चेतावनी दिए ।
प्रमुख जिल्ला अधिकारी प्रेमप्रसाद लुइँटेलले निर्वाचनलाई शान्तिपूर्ण बनाउन सुरक्षा व्यवस्थालाई प्राथमिकतामा राखिएको जानकारी दिँदै माघ २१ गतेदेखि जिल्लामा नेपाली सेना परिचालन भइसकेको बताए । उनले उम्मेदवार, राजनीतिक दल, सरकारी कर्मचारी र आम नागरिक सबैले आचारसंहिता पालना गर्नुपर्नेमा जोड दिए ।