जनकपुरधाम । मधेश प्रदेशका मुख्यमन्त्री सरोज कुमार यादवले बिना विभागिय तथा माओवादी केन्द्रका नेता भरत प्रसाद साहलाई वन तथा वातावरण मन्त्रालयको जिम्मेवारी तोकिएका छन् ।
६ बैशाखमै बिना विभागिय मन्त्रीको रुपमा सपथ लिएका मन्त्री साहलाई आईतवार मुख्यमन्त्री यादवले वन तथा वातावरण मन्त्रालयको जिम्मेवारी तोकेका छन् । मुख्यमन्त्री यादवको सिफारिसमा मधेश प्रदेश प्रमुख सुमित्रा भण्डारीले मन्त्री साहको जिम्मेवारी तोकेका हुन् ।
अर्थ मन्त्रालय पाउँनुपर्ने अडानमा रहेका मन्त्री साहले मुख्यमन्त्री यादवले एकलौटी रुपमा मन्त्रालयको जिम्मेवारी तोकिएकोमा आपति जनाएका छन् । सत्ता गठबन्धन दल बीच भएको सहमति विपरित मुख्यमन्त्री यादवले आफुखुसी मन्त्रालय तोकिएको भन्दै मन्त्री साहले उक्त जिम्मेवारी लिन अस्वीकार गरेका छन् ।
शक्ति संतुलनको हिसाबले आफुहरुले अर्थ मन्त्रालय पाउनुपर्ने उल्लेख गर्दै मन्त्री साहले भने,‘ मुख्यमन्त्री ज्युले सहमति विपरित जिम्मेवारी तोक्नु भएको छ । तत्काल बिना कुनै सहमति म त्यो जिम्मेवारी लिदिनन् ।’ चौथो पटक मुख्यमन्त्री यादवले गत ४ बैशाखमा विश्वासको मत लिनु अघि शक्ति संतुल्नको हिसाबले मन्त्रालयको बाँडफाँड हुने भनेर मुख्यमन्त्री यादवले सम्झदारी गरेको मन्त्री साहको भनाई छ ।
माओवादीको लुम्बनी प्रदेशमा तीन वटा सिट हुदाँ दुई मन्त्रालय चाहिन्छ, मन्त्री साहले भने,‘ हामी त मधेशका सत्ता गठबन्धनका तेस्रो दल हो । तरपनि मुख्यमन्त्री सहमति अनुसारको मन्त्रालय दिन अनाकारी गरिरहेका छन् ।’
यता, मुख्यमन्त्री यादवले माओवादी केन्द्रलाई अर्थ मन्त्रालय दिने जस्तो कुनै सहमति नभएको दावि गरेका छन् ।
माओवादीसँग त्यस्तो कुनै सहमति भएको छैन,मुख्यमन्त्री यादवले भने,‘ उहाँलाई अर्थ मन्त्रालय नै चाहिन्छ भने उक्त विषयमा गठबन्धनका शिर्ष नेताहरुले नै निर्णय गर्ने हो, म केहि गर्न सकिनन् ।’ मुख्यमन्त्री यादवले माओवादी केन्द्रलाई सहमति भन्दा थप एक बढी मन्त्रालय दिएको दावि गरे ।
