जनकपुरधाम ।  प्रधानमन्त्री केपी शर्मा ओलीले एकैसाथ
मधेश प्रदेशमा ६४ वटा कालोपत्रे सडकको शिलान्यास गर्ने भएको छ ।
मधेस प्रदेश सरकार भौतिक पूर्वाधार विकास मन्त्रालयको ‘एक निर्वाचन क्षेत्र, एक सडक’ योजना अन्तर्गत प्रधानमन्त्री ओलीले भोलि आइतबार प्रदेशका ८वटै जिल्लाका ६४ वटा कालोपत्रे सडक निर्माणको शिलान्यास गर्ने भएका छन् ।
प्रधानमन्त्री ओलीले जनकपुरधामस्थित महेन्द्र नारायण निधि मिथिला संस्कृति भवनबाट ती सबै सडकहरूको डिजिटल शिलान्यास गर्ने कार्यक्रम तय भएको प्रदेशका भौतिक पूर्वाधार विकास मन्त्री सरोजकुमार यादवले जानकारी दिए ।
मन्त्री यादवले मधेशका ८ जिल्लाका ६४ प्रदेश निर्वाचन क्षेत्रमा कालोपत्रे सडक निर्माणका लागि आवश्यक स्रोत सुनिश्चित भइसकेको बताए।
मन्त्री यादवका अनुसार बहुवर्षीय योजनाअन्तर्गत आगामी तीन वर्षभित्र सडक निर्माण सम्पन्न गर्ने लक्ष्य राखिएको छ। सडकहरू साढे ५ मिटरदेखि ७ मिटर चौडाइमा निर्माण हुनेछन्।
तीन वर्षभित्रमा ६४ वटै सडक निर्माण कार्य सम्पन्न गर्ने लक्ष्यसहित चालू आर्थिक वर्षमा मधेश प्रदेश सरकाले  करिब १२ अर्ब ७० करोड रुपैयाँ बजेट विनियोजन गरिएको मन्त्री यादवले वताए ।