जनकपुरधाम । सप्तरीको रुपनी गाउँपालिका–६ स्थित दुधैला खोलामा शंकास्पद वस्तु विस्फोट हुँदा चार जना बालक घाइते भएका छन् ।
प्रहरीका अनुसार वनभोजका क्रममा खोलामा फेला परेको र रकेटजस्तो देखिने वस्तु बालकहरूले चुल्हो नजिक राखेका थिए। सोही क्रममा अचानक विस्फोट हुँदा चारै जना बालक घाइते भएका हुन् । विस्फोटमा घाइते हुनेहरूमा स्थानीय साजन आले मगरका ११ वर्षीय छोरा साहस, मनोज थापा मगरका ९ वर्षीय छोरा प्रशिस, कर्णबहादुर थापा मगरका १६ वर्षीय छोरा कविर र पदमबहादुर विकका १३ वर्षीय छोरा सुरज रहेका छन् ।
विस्फोटका कारण उनीहरूको शरीरका विभिन्न भागमा छर्रा लागेको छ ।
घाइते बालकहरूलाई तत्काल उपचारका लागि छिन्नमस्ता अस्पताल, राजविराज लगिएको छ। उनीहरूको अवस्था चिन्ताजनक नरहेपनि अहिले चिकित्सकको निगरानीमा उपचार भइरहेको बताईएको छ ।
घटनाको जानकारी पाउनासाथ प्रहरी टोली घटनास्थलमा पुगेर प्रारम्भिक अनुसन्धान सुरु गरेको छ। उक्त शंकास्पद वस्तु कहाँबाट आएको र कसरी खोलामा पुगेको भन्ने विषयमा थप अनुसन्धान भइरहेको जिल्ला प्रहरी कार्यालय सप्तरीका प्रवक्ता डम्बर बहादुर पुरीले बताए ।
यसैबीच, प्रहरीले सर्वसाधारणलाई शंकास्पद वा विस्फोटकजस्तो देखिने कुनै पनि वस्तु भेटिएमा नछुन र तुरुन्त नजिकको प्रहरी कार्यालयमा जानकारी गराउन आग्रह गरेको छ ।
