भारतबाट दोस्रो पटक पेट्रोलियम पदार्थको मूल्य कम भएर आएको छ । यसअघि भारतबाट मूल्य कम भएर आएपनि नेपाल आयल निगमले मूल्य कम गरेका थिएन् ।भारतीय आयल कर्पोरेसन आईओसीले सोमबार प्राप्त मूल्यसूचीअनुसार डिजल प्रतिलिटर १२ रुपैयाँ ४५ पैसा र पेट्रोल प्रतिलिटर १६ रुपैयाँ ८० पैसा कम भएर आएको छ। यसअघि पेट्रोल प्रतिलिटर १५ रुपैयाँ ७६ पैसा र डिजेल प्रतिलिटर १६ रुपैयाँ ५६ पैसा कम भएर आएको थियो । भारतबाट मूल्य घटेर आएपछि अब समग्रमा निगमको पाक्षिक नोक्सानी करिब ७५ करोडमा झर्ने भएको छ । योसँगै लामो समयपछि पेट्रोलको बिक्रीमा निगम नाफामा गएको छ । नेपालमा मूल्य नघटाएमा निगमलाई पेट्रोलमा प्रतिलिटर २ रुपैयाँ हाराहारी नाफा हुनेछ । डिजलमा प्रतिलिटर करिब १० रुपैयाँ नोक्सानी रहने निगम स्रोतले जनाएको छ । अन्तर्राष्ट्रिय बजारमा कच्चा तेलको मूल्यमा गिरावट आएपछि दोस्रो पटक नेपाल आयल निगमलाई इन्धनको भाउ कम भएर आएको छ ।