काठमाडौं । बुधवारयता हरेक दिन कीर्तिमान कायम गरिरहेको सुनको भाउले शुक्रवार (आज) पनि नयाँ उचाइ छोएको छ । नेपाल सुनचाँदी व्यवसायी महासंघका अनुसार आज सुनको भाउ तोलामा ८०० रुपैयाँ बढेर १ लाख १३ हजार ३०० रुपैयाँ कायम भएको छ । यो अहिलेसम्मकै सर्वाधिक हो ।
यसअघि गत बिहीवार सुनको भाउ अहिलेसम्मकै सर्वाधिक कायम भएको थियो । उक्त दिन सुन तोलाको १ लाख १२ हजार ५०० रुपैयाँ तोकिएको थियो । त्यसको अघिल्लो दिन बुधवार पनि सुनको भाउले कीर्तिमान कायम गरेको थियो । सुनचाँदी व्यवसायी महासंघका अनुसार उक्त दिन सुनको भाउ १ लाख १२ हजार कायम भएको थियो ।
त्यसअघि गत वैशाख २१ गते सुनको भाउ सर्वाधिक कायम भएको थियो । उक्त दिन सुन ताेलाकाे १ लाख ११ हजार ८०० रुपैयाँमा कारोबार भएको सुनचाँदी व्यवसायी महासंघले जनाएको छ । सुनको भाउले कीर्तिमान कायम गर्दा चाँदीको मूल्य पनि बढेको छ । बिहीवारको तुलनामा चाँदीको मूल्य तोलामा २५ रुपैयाँ बढेर १ हजार ४३५ कायम भएको छ । गत बिहीवार चाँदीको मूल्य तोलाको १ हजार ४१० रुपैयाँ तोकिएको थियो ।
सम्बन्धित खबर
