काठमाडौं । पछिल्लो ६ महीनामा रेमिट्यान्स (विप्रेषण) आप्रवाह २४ प्रतिशतले बढेको छ । नेपाल राष्ट्र बैंकले सोमवार (आज) सार्वजनिक गरेको प्रतिवेदन अनुसार गत आर्थिक वर्ष (आव)काे पहिलो ६ महीनाको तुलनामा चालू आवको सोही अवधिमा रेमिट्यान्स आप्रवाह २४.३ प्रतिशतले बढेको हो ।समीक्षा अवधिमा रेमिट्यान्स आप्रवाह बढेर रू. ५ खर्ब ८५ अर्ब ८ करोड पुगेको छ । गत आवको सोही अवधिमा भने रेमिट्यान्स ५ प्रतिशतले घटेको थियो । वैदेशिक रोजगारमा जानेकाे संख्या बढेसँगै रेमिट्यान्स बढेको हो । पछिल्लो समय मलेसियामा जाने कामदारको संख्या ह्वात्तै बढेकाे छ ।