जनकपुरधाम । धनुषाधाम नगरपालिका वडा नं १ को अध्यक्षमा नेकपा (माओवादी केन्द्र) का सुनिल कापर केवट निर्वाचित भएका छन् ।
आइतबार भएको उपचुनावमा केवटले छ सय ८४ मत प्राप्त गरी विजयी भएका निर्वाचन कार्यालयले जनाएको छ । सो वडामा काँग्रेस नेता आनन्दन ढुगंना र धनुषाधाम नगरपालिकाका मेयर बालेश्वर मण्डलका घर समेत रहेको छ ।
कार्यालयका अनुसार नेपाली कांग्रेसका अशोककुमार मण्डलले छ सय दुई मत प्राप्त गरे । साथै जनता समाजवादी पार्टी नेपालका अजयकुमार यादवले चार सय ९९, नेकपा (एमाले) का प्रमोद यादवले तीन सय ६५, राष्ट्रिय प्रजातन्त्र पार्टीका रामदेव सिंह दनुवारले २७ र जनमत पार्टीका कुशेश्वर मण्डलले २५, राष्ट्रिय स्वतन्त्र पार्टीका राम नरेश दासले १० मत पाए ।
यसअघि यो वडाको वडाध्यक्षमा नेपाली कांग्रेसका विश्वनाथ यादव निर्वाचित भएका थिए । उनको निधन भएपछि सो वडामा उपचुनाव भएको हो ।
