जनकपुरधाम । जानकी नवमीको अवसरमा मधेश प्रदेश सरकारले आज सार्वजनिक विदा दिएको छ ।
गृह, सञ्चार तथा कानुन मन्त्रालयले जानकी नवमीको अवसरमा प्रदेशभर सार्वजनिक विदा दिएको छ । जनकपुरधामसहित नेपाल भारतका विभिन्न स्थानमा आज धुमधामका साथ सीता जन्मजयन्ती मनाईदै छ । वैशाख शुक्लनवमीको दिनलाई जानकी नवमीको रुपमा मनाउने गरिन्छ ।
सीताको जन्मदिनको अवसरमा आज विहानैदेखि जानकी मन्दिर, राम मन्दिर र जनक मन्दिरलगायत मन्दिरमा पूजाआजा गर्ने श्रद्धालुहरुको भिड लागेको छ । जानकी नवमीमा सहभागी हुन नेपाल तथा भारतका विभिन्न स्थानबाट साधुसन्त, श्रद्धालु भक्तजन एवं पर्यटकहरु जनकपुरधाम पुगेका छन् ।
विहान दुधमती नदीमा स्नान, १० बजेदेखि मन्दिरमा बधाइगान, १२ बजे प्राकट्य उत्सव, साँझमा जानकी डोला यात्रा, रातिमा तिल्कोत्सव र पुनः बधाई गानको कार्यक्रम राखिएको जानकी मन्दिरका छोटा महन्त रामरोशन दासले जानकारी दिए । जानकी नवमीको अवसरमा भारतका धर्मगुरु रामभद्रचार्य महाराज समेत जनकपुरधाम आएका छन् ।
सम्बन्धित खबर
