जनकपुरधाम । मधेश प्रदेश लोकसेवा आयोगको अध्यक्षमा शिवराम यादवलाई नियुक्त गरिएको छ ।
मुख्यमन्त्री सतिश कुमार सिंहले बिहीबार साँझ नै यादवलाई आयोगको अध्यक्षमा सिफासिर गरेका थिए । मुख्यमन्त्रीको सिफारिसअनुसार शुक्रबार प्रदेश प्रमुख सुमित्रा सुवेदी भण्डारीले यादवलाई प्रदेश सेवा आयोगको अध्यक्षको रूपमा पद तथा गोपनीयताका शपथ गराकी छन् । ५७ वर्षीय यादव सिरहाको सिरहा नगरपालिका– १३ गमहरिया निवासी हुन् । गत फागुनमा उमेर हदको कारण मधेश प्रदेश लोकसेवा आयोगका तत्कालीन अध्यक्ष सुरेन्द्र प्रसाद यादव सेवानिवृत्त भएपछि सो पद रिक्त थियो ।
यसअघि तत्कालीन जसपा नेतृत्वको सरकारले पनि यादवलाई नै आयोगको अध्यक्ष बनाउने तयारी गरेको थियो । तर सत्ता फेरबदल तथा पार्टी नै विभाजनपछप जसपा नेपाल नेतृत्वको सरकारले आयोगको अध्यक्ष चयन गर्न सकेको थिएन ।
यता, जसपा नेपालले नै रोजेका व्यक्तिलाई आखिर किन जनमतले प्रदेश लोकसेवा आयोगको अध्यक्ष बनायाे भन्ने राजनीति वृत्तमा चर्चाको विषय बनेको छ । स्राेतका अनुसार यादवलाई आयोगको अध्यक्ष बनाउनमा प्रधानमन्त्री तथा नेकपा एमालेका अध्यक्ष केपी शर्मा ओलीको महत्वपूर्ण भूमिका छ ।
ओली सरकारलाई समर्थन गरेको उपेन्द्र यादव नेतृत्वकाे जसपा नेपाल अहिले केन्द्रमा न त प्रदेश सरकारमै छ । जसपा नेपाल अहिले मधेश प्रदेशको प्रमुख प्रतिक्षि दल पनि हो । आयोगको अध्यक्ष नियुक्ति सिफरिस गर्ने समितिमा मुख्यमन्त्री, सभामुख र प्रमुख प्रतिपक्षी दलका नेता सदस्य हुने प्रवधान छ । सरकारले आयोगको अध्यक्ष नियुक्त गर्दा प्रमुख विपक्षी दललाई विश्वासमा लिनु आवश्यक हुन्छ ।
यस्तो अवस्थामा मुख्यमन्त्री सिंह जसपा नेपाललाई आयोगको कुनै सदस्य दिएर अध्यक्ष आफैँले रोजेको व्यक्तिलाई नियुक्त गर्ने तयारीमा थिए । तर प्रधानमन्त्री केपी शर्मा ओलीले यादवलाई अध्यक्ष नियुक्ति गर्न मुख्यमन्त्रीलाई सुझाएका थिए ।
यादवलाई अध्यक्षमा नियुक्त गर्दा जसपा नेपालले पनि सहज रूपमा स्वीकार गर्ने तथा आफ्नो इन्ट्रेस्ट पनि पूरा हुने देखेर प्रधानमन्त्री ओलीले यस्तो सुझाव दिएको स्राेतको दाबी छ । मुख्यमन्त्री सिंहले पार्टीको निर्देशन फरक व्यक्तिलाई बनाउनुपर्ने रहेको भनेका थिए । तर प्रधानमन्त्रीले यादवलाई अध्यक्ष नियुक्त नगरे प्रदेश सरकारको नेतृत्व नै फेरिन सक्ने चेतावनी दिएपछि बाध्य भएर यादवलाई आयोगका अध्यक्षमा सिफारिस गरेको नेकपा एमालेका एक सांसदले बताए ।
यादवलाई अध्यक्ष बनाउन जसपा नेपालसँगै कांग्रेस र एमालेको पनि चाहना रहेकोले दवाव दिएर नियुक्त भएको उनले बताए ।
अर्कोतर्फ यादवले जनमतभित्र पनि आफ्नो लवी बलियो बनाएका थिए । प्रदेश उपसभामुख बतिता इश्रका श्रीमान् पनि यादवसँगै लामो समय काम गरेकोले र दुवैबीच राम्रो मित्रता रहेकोले पनि जनमतले यादवलाई अध्यक्षमा स्वीकार गरेको जनमतका एक नेताले बताए ।
सम्बन्धित खबर
