काठमाडौँ – नेकपा (एमाले)ले चुनावी घोषणा पत्र सार्वजनिक गरेको छ।
मंगलबार दिउँसो काठमाडौँको याक एण्ड यति होटलमा अध्यक्ष केपी शर्मा ओलीले डिजिटल प्रविधिबाट आसन्न प्रतिनिधिसभा र प्रदेशसभा निर्वाचनका लागि पार्टीको घोषणा प्रविधिबाट सार्वजनिक गरेका हुन्।
घोषणा पत्रमा पार्टीले अघि सारेको ‘समृद्ध नेपालः सुःखी नेपाली’को राष्ट्रिय संकल्पलाई निरन्तरता दिइएको छ। करिब २० हजार शब्द रहेको घोषणा पत्रमा मुलुकको समृद्धिका लागि राष्ट्रिय अर्थतन्त्रको निर्माणमा जोड दिइएको छ।
एमालेले घोषणापत्रमा कृषि विकास, महिला सुरक्षा, सुरक्षित आवास, युवाको रोजाइमा रोजगारी दलाउने, वार्षिक ५ लाख रोजगारी सिर्जना गर्ने, दुई वर्षभित्र सबैलाई साक्षर बनाउन, मधुमेहको निःशुल्क उपचार, सबै पालिकामा आधारभूत स्वास्थ्य उपचार मासिक १० हजार लिटर पानी उपलब्ध गराउने लगायत विषय समेटिएको छ।
घोषणापत्र सार्वजनिक भएसँगै ‘ओलीसँग लाइभ डिबेट’ पनि यहीँबाट सुरु हुने एमालेले जनाएको छ। सत्तारुढ गठबन्धनमा आबद्ध नेपाली कांग्रेस, नेकपा (माओवादी केन्द्र), नेकपा (एकीकृत समाजवादी)ले संविधानको रक्षालाई मूल नारा बनाएर यसअघि नै चुनावी घोषणापत्र सार्वजनिक गरिसकेका छन्।