फाएजा फहमीदा
जनकपुरधाम । मिथिलामा प्रसिद्ध रहेका जितिया पर्व आज हिन्दु समुदायका विवाहित महिलाहरूले तलाउ तथा पोखरीम स्नान गरी मनाएका छन् । पति तथा सन्तानको सुख, शान्ति र लामो आयुको कामना गर्दै व्रतालु महिलाहरूले यो पर्व मनाउने गर्छन् । जितिया पर्वको अवसरमा जनकपुरधामको गंगासागर, धनुष सागर, अरगजा पोखरीमा नुहाइधुवाई गर्ने व्रतालु महिलाहरूको भिड लागेको छ ।
पर्व प्रत्येक वर्ष असोज कृष्णपक्ष सप्तमीदेखि नवमीसम्म मनाइने चलन रहेको छ । पर्वको पहिलो दिन सप्तमी तिथिमा ‘नहा, खा’ (नुहाएर खानु) विधिबाट पर्व सुरु गर्छन् । व्रतालु महिलाहरूले नदी, पोखरी तथा जलाशयमा स्नान गरी घिरौँलाको पातमा पिना, तेल र सिन्दुर भगवान् जितमाहनको पूजा गर्ने चलन रहेको छ ।
पुजजापछि व्रतालु महिलाले कोदोको रोटी, नुनीको साग र माछा खाने चलन छ । जसलाई स्थानीय भाषामा ‘माछ मरुवा’ पनि भन्ने गरिन्छ । जितियाको दोस्रो दिन अष्ठमीमा २४ घन्टा लामो निराहार उपवास बसेर भगवान जितमाहनको कथा सुन्ने चलन रहेको जनकपुरधाम उपमहानगरपालिका –७ बस्ने राधिका साहले बताइन् ।
अन्तिम दिन नवमी तिथिमा पुनः नदी, पोखरी तथा जलाशयमा स्नान गरी घरमा आएर चौका लगाई चिउरा, दही तथा सखरको प्रसाद अर्घ दिएपछि जितिया पर्व सम्पन्न हुन्छ ।
सम्बन्धित खबर
